ҚР Мемлекеттік хатшысы міндетін уақытша атқару ҚР Президенті Әкімшілігінің жетекшісі Нұрлан Нығматулинге жүктелді, - деп хабарлайды Tengrinews.kz Ақорданың баспасөз қызметіне сілтеме жасап.
"Мемлекет басшысының өкімімен Әділбек Рыскелдіұлы Жақсыбеков Қазақстан Республикасы Қауіпсіздік кеңесінің хатшысы міндетін уақытша атқарудан босатылды", - делінген Ақорданың сайтында жарияланған хабарламада.
Сондай-ақ Серік Ахметовтің басқа жұмысқа ауысуына байланысты қызметтен босатылғаны хабарланған.
"Мемлекет басшысының өкімімен Қазақстан Республикасы Қауіпсіздік кеңесі хатшысының орынбасары – Қазақстан Республикасы Қауіпсіздік кеңесі хатшылығының меңгерушісі Азамат Құрманбекұлы Әбдімомынов Қазақстан Республикасы Президентінің көмекшісі – Қауіпсіздік кеңесінің хатшысының міндетін уақытша атқарушы болып тағайындалды", - делінген сайтта.
Еске сала кетейік, Президенттің Жарлығымен Әділбек Жақсыбеков Астана қаласының әкімі, ал Астананың экс-әкімі Иманғали Тасмағамбетов Қорғаныс министрі болып тағайындалған еді.