Үкіметте бұрынғы Семей ядролық полигонының шартты түрде таза жерінің бір бөлігін қолданысқа беру ұсынылды. Энергетика министрі Болат Ақшолақов ластанған жерлерді қалпына келтіру жұмыстары жүргізілмей жатқанын айтты, - деп хабарлайды Tengrinews.kz тілшісі.
"Полигон жабылғалы бері бірқатар проблемалық мәселе анықталды. Бұрынғы Семей полигонының жерлері үш облыс әкімдіктері қарамағындағы босалқы жерлерге жатады, бұл бөгде адамдардың іс-әрекеттері мен осы аумақтарда болып жатқан оқиғаларды бақылауды қиындатады.
Полигонның артық ластанған жерлерін қалпына келтіру және рекультивациялау жұмыстары жүргізіліп жатқан жоқ. Сондай-ақ, радиоактив ластану деңгейін тұрақты бақылаудың болмауына байланысты радиоактив ластанудың миграциясы туралы өзекті деректер жоқ. Ластанған және таза аумақтардың бөлінбеуінен бүгінде қолдануға жарамды жерлердің едәуір бөлігі бос тұр", - деді министр Мәжіліс отырысында сөйлеген сөзінде.
Оның айтуынша, бұл мәселелер шешімі депутаттар бірінші оқылымда қараған "Семей ядролық қауіпсіздік аймағы туралы" заң жобасында нақты көрсетілген.
Заң жобасында мыналар ұсынылған:
- бұрынғы Семей ядролық сынақ полигонындағы жұмыстардың орындалуына жауапты ұйымды тағайындау;
- кешенді экологиялық зерттеу және мемлекеттік экологиялық сараптама нәтижелері бойынша радиациялық шектен тыс ластануы бар аумақтардың және шартты түрде таза жерлердің шекаралары мен ауданын айқындау;
- ластанған жерлерде Семей ядролық қауіпсіздік аймағын құру;
- бұрынғы полигонның ластанған аумақтарын қалпына келтіру;
- аймақ аумағындағы радиациялық жағдайды бақылау;
- бұрынғы полигонның шартты түрде таза жерлерін шаруашылық айналымға беру.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
