Ресейлік азаматша 50 оқты заңсыз алып өткені үшін сотталды, - деп хабарлайды Tengrinews.kz тілшісі Астана қалалық сотының баспасөз қызметіне сілтеме жасап.
"Ресей азаматшасы Санкт-Петербургке ұшпақшы болып елордадағы "Нұрсұлтан Назарбаев" әуежайында паспорттық бақылаудан өту кезінде өзімен бірге аң аулайтын қаруға арналған 50 оқ алып өтпекші болған. Олар тексеріс кезінде тәркіленді. Оқтар әйелдің сөмкесінде болған", - делінген хабарламада.
Астана қаласы Есіл ауданының №2 сотының шешімімен әйел ҚР Қылмыстық кодексінің 287- бабы ("Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру") және 286-баптың 1 және 1-бөліктері бойынша ("Айналыстан алып қойылған заттардың немесе айналысы шектелген заттардың контрабандасы") айыпты деп танылды.
Ресейлік азаматшаға 600 айлық есептік көрсеткіш көлемінде 1 361 400 теңге айыппұл салынды. Сот үкімі әлі заңды күшіне енген жоқ.
