+7 (777) 001 44 99
Қазақша
Русский
English
Павлодар облысында микроавтобус жеңіл автокөлікпен соқтығысып, салдарынан 9 адам зардап шекті. Ауыр жарақат алған екі адам комада жатыр, - деп хабарлайды Tengrinews.kz тілшісі.
Дәрігерлер 35 жастағы әйел мен 22 жастағы қыздың жағдайы ауыр екенін айтты.
"Екі науқас №1 қалалық аурухананың жансақтау бөлімінде жатыр. Олар жасанды тыныс алу аппаратына қосылған", - деді облыстық денсаулық сақтау басқармасы өкілдері.
Ведомство мәліметінше, 17 жастағы жеткіншектің де жағдайы өте ауыр. Ол ашық бассүйек-ми жарақатын алған, маңдайдағы сүйектері сынған. Жәбірленушіге ота жасалған. Ол облыстық балалар ауруханасының жансақтау бөлімінде жатыр.
Тағы бір 35 жастағы ер адам №1 Павлодар қалалық ауруханасының нейрохирургия бөлімінде жатыр. Жағдайы орташа ауыр. Қалған бес зардап шегуші үйлеріне шығарылды. Олардың барлығы Қарағанды қаласының тұрғыны.
Еске салайық, жол апаты 9 мамырда сағат 20.40-та Баянауыл ауылынан 20 шақырым жерде болған. Audi 80 B4 көлігінің 47 жастағы жүргізушісі Volkswagen Crafter микроавтобусымен соқтығысты.
Жол апаты салдарынан екі автокөлік жыраға аударылып кеткен. Volkswagen Crafter-дің 1986, 2000 және 2005 жылғы төрт жолаушысы түрлі жарақат алып, ауруханаға жеткізілген.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
