+7 (777) 001 44 99
Қазақша
Русский
English
"Эйр Астана" компаниясының ұшақтары Павлодардағы ауа райының қолайсыздығынан кешіктіріліп жатыр, - деп хабарлайды Tengrinews.kz тілшісі әуежайдың диспетчерлік қызметіне сілтеме жасап. Павлодарда қалың тұманның басып тұрғанына екі күн болды.
"Ауа райының қолайсыздығына байланысты Астана - Павлодар және Павлодар - Астана бағыттарындағы 315/316 рейстері кешіктірілді. Ұшақтардың ұшып кету уақыты қауіпсіздікті сақтау мақсатында өзгертілді. Ұшып кету уақыты шамамен 19.50 және 20.50", - деп хабарлады әуежайдың диспетчерлік қызметінің мамандары. Мұнымен қатар, Алматы - Павлодар және Павлодар - Алматы бағытындағы 305/306 рейстер де кешіктіріліп жатыр. Павлодардағы ауа райына байланысты олардың ұшып кету уақыты 7 қараша күнгі сағат 14.30-ға және 15.30-ға ауыстырылды.
"Бұл - алдын ала бекітілген уақыт. Біз ауа райы жағдайына қараймыз. Әзірше көріну мүмкіндігі ұшуға жеткіліксіз болып тұр", - деді диспетчерлік қызмет өкілдері.
Айта кетейік, 6 қарашада "Эйр Астана" әуе компаниясының Астана - Павлодар бағытындағы рейсінің кешігуіне Павлодардағы ауа райы себеп болды. Ұшақ қалың тұманнан әуежайға қона алмай, Астанаға қайтып кетті. Сонымен бірге, 6 қараша күні ауа райының қолайсыздығынан Астанада ұшып келу және ұшып кету рейстері кешіктірілген болатын.
