Сабуров Қазақстандағы әйелдерге қатысты зорлық-зомбылық туралы ойын айтты 10 шілде 2021, 10:03
Қазақстандық және ресейлік комик Нұрлан Сабуров Esquire журналының ресейлік нұсқасының бас редакторы Сергей Минаевқа берген сұхбатында Қазақстандағы әйелдерге қатысты зорлық-зомбылық мәселесін көтерді, - деп хабарлайды Tengrinews.kz тілшісі.
Сабуров Минаевтың әзілін қолдай отырып, мұндай жағдай елде кең таралғаны сонша оны "мемлекеттік деңгейде қолдайды" деп айтуға болатынын жеткізді.
"Менің ойымша, бұл Конституцияда жазылған", - дейді Сабуров әзілдеп.
Ол кейде әйелдерге қатысты зорлық-зомбылық туралы әзілдеген кезде, Ресейде мұны ирония ретінде қабылдайтынын айтты, ал Қазақстанда: "Дұрыс, дұрыс, әйелдерді ұру керек. Мен дұрыс айтып тұрмын ғой? Дұрыс. Яғни, кейбіреулер, әрине, бәрі бірдей емес", - деді комик.
Сабуров Минаевқа Қазақстанда феминистік қозғалыстың деңгейі Ресейге қарағанда "өте қарапайым деңгейде" екенін айтты.
"Ол (феминизм тақырыбы. - автор.) бар, бірақ тек ірі қалаларда. Бізде әйелдерге деген қарым-қатынас мәселесі шешілмей тұр, тұрмыстық зорлық-зомбылық өте кең таралған. Қазір бұл мәселе қарқын алып келеді, ал дұрыс ойлайтын адамдар мұны әлдеқайда жақсы қабылдайды", - деді Нұрлан Сабуров.
Сілтемесіз жаңалық оқисыз ба? Онда Telegram желісінде парақшамызға тіркеліңіз!