Әлеуметтік желілерде өзін "Астана-Теплотранзит" ЖШС-нің бұрынғы қызметкерімін деп таныстырған қолданушының аноним хабарламасы тарады. Жарияланымда елорданың жаңа тұрғын үй кешендерінде тұтынушыларға жылу үшін төлемдер негізсіз асыра есептелетіні айтылған, - деп хабарлайды Tengrinews.kz.
Не болды?
Threads әлеуметтік желісінде жарияланған жазба, желі қолданушылары арасында қызу талқыға түсті. Автордың айтуынша, жаңа үйлердің тұрғындары коммуналдық төлемдерді бақыламай бермейді: пәтерлерін жалға береді, сатады немесе бұған тиісті көңіл бөлмейді.
"Жаңа үйлерде көптеген тұрғындардың коммуналдық қызметтерге уақыты жоқ: пәтерлерін жалға береді, сатады немесе шоттарды қадағаламайды. Негізінен отбасылы адамдар - бұған бас қатырмайды. Соны пайдаланып, төлемге шағын сомаларды қоса отырып, "орташа көрсеткішпен" есептей салады", - делінген жарияланымда.
Автордың сөзінше, есептелген соманың мән-жайын білмек болғанда, стандартты жауап айтылады.
"Кімде-кім тексеріп, анықтай бастаса, дайын тұрған стандартты себептер шыға келеді: "тексеруден өтпеген", "мәліметтер берілмеген", "кеңсеге келіңіз". Соңында мәселе жекелей шешіледі - ол адамның есептегіші "дұрыс жұмыс істей бастайды", - дейді ол.
Сондай-ақ автор мұндай жағдай көптеген тұрғындардың бейжайлығынан байқалмай қалуы мүмкін деп болжайды.
"Сұрамасаң - артық төлей бересің. Ізденіп, анықтай бастағанда "қателер" жойылып, бәрі дұрыс есептеле бастайды. Ал қалғандары үндемегендіктен, бәрі бұрынғыша қала береді. Бұл қаншама пәтер екенін және қандай сомалар екенін елестетіп көріңізші", - делінген жазбада.
"Астана-Теплотранзит" не деп жауап берді?
"Астана-Теплотранзит" баспасөз қызметі әлеуметтік желілерде тараған ақпараттың шындыққа жанаспайтынын мәлімдеді.
"Жылу энергиясы үшін есептеулер қолданыстағы заңнама талаптарына қатаң сәйкес - нақты тұтыну негізінде немесе есепке алу аспаптарының көрсеткіштері болмаған жағдайда есептеу тәсілімен жүргізіледі", - деп хабарлады компания тілшіге.
Ұйым түбіртектегі қорытынды сомаға бірнеше фактор әсер ететінін түсіндірді.
"Есептеулер мөлшері сыртқы ауа температурасына, жылу энергиясын тұтыну көлеміне, сондай-ақ есепке алу аспаптарының бар болуына және дұрыс жұмыс істеуіне байланысты. Есептеу кезінде пайдаланылатын барлық мәлімет түбіртектерде көрсетіледі және оны тұтынушылардың тексеруіне болады", - деді баспасөз қызметі.
Сондай-ақ компания әрбір өтініш бойынша тексеру жүргізілетінін баса айтты.
"Есептеулерге қатысты сұрақтар немесе күмән туындаған жағдайда, әрбір мекенжай бойынша жүргізілген барлық есептеуге түсініктеме бере отырып, егжей-тегжейлі тексеру жүргізіледі", - деп толықтырды "Астана-Теплотранзит".