Жетісу облысының тасжолдарына "Крис-П" жылжымалы жылдамдық өлшегіштері қайтарылды. Жүйені пайдаланудың алғашқы нәтижелері айтылды, - деп хабарлайды Tengrinews.kz тілшісі.
Тәртіп сақшылары мәліметінше, Жетісу облысында жыл басынан бері 443 жол-көлік оқиғасы тіркелген. Салдарынан 116 адам қаза тауып, тағы 716 адам жарақат алған. Жол апаттарының негізгі себептерінің бірі жылдамдықты шамадан тыс арттыру екені атап өтілді.
"Осыған байланысты, облыс жолдарында жол-көлік оқиғаларының алдын алу, жол қозғалысына қатысушылардың өлімі мен жарақатын азайту мақсатында "Крис-П" фоторадар жылжымалы кешенін пайдалана бастады.
Халық арасында "үш аяқты" деген лақап атқа ие құрылғы ЖҚЕ бұзғандарды фото және бейнетіркеумен автокөлік құралдарының жылдамдық режимін автоматты бақылау үшін қолданылады", - деді Жетісу облыстық Полиция департаменті өкілдері.
Облыс полицейлерінде барлығы сегіз "Крис-П" кешені бар. Ведомство мәліметінше, "Крис-П" жүйелерін пайдалану облыстың автожолдарындағы апат деңгейін төмендетуге көмектескен.
"Талдау 26 қазан мен 31 қазан аралығында патрульдік полиция қызметкерлері "Крис-П" қолданған республикалық маңызы бар жолдарда жылдамдықты арттыру салдарынан бірде-бір ЖКО тіркелмеген.
Сонымен қатар, кейінгі екі айда (көрсетілген апталық кезеңді есептемегенде) республикалық маңызы бар жолдарда 42 жол-көлік оқиғасы тіркелді. Салдарынан 20 адам қаза тауып, 73 адам түрлі дене жарақаттарын алған. Айта кету керек, жол-көлік оқиғаларының басым бөлігі жылдамдықты шектен тыс асыру салдарынан", - деді облыстық ПД баспасөз қызметі өкілдері.
Посмотреть эту публикацию в Instagram
Бір апта ішінде "Крис-П" радарлары жылдамдық шектеуін бұзған 276 жағдайды тіркегені хабарланды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
