Ақтөбе тұрғындары қара қоңыздардың қаптап кеткеніне жаппай шағымданып жатыр. Жәндіктер аулалар мен саябақтарда үймелеп, үйлер мен пәтерлерге тіпті масаға қарсы торлар арқылы да кіріп жатыр. Әкімдіктегілер бұл құбылыстың себебін түсіндірді, - деп хабарлайды Tengrinews.kz.
Кейінгі күндері әлеуметтік желілерде Ақтөбе тұрғындары қара қоңыз қаптап кеткеніне шағымдана бастады.
"Олар тіпті тордан да өтіп кетеді. Кеше жұмыстан келсем, пәтердің ішінде қара қоңыз толып жүр... Аулада да көз ашпайсың. Бұл не қылған қаптаған жәндік?" - деп сұрайды ақтөбеліктер.
Қала әкімдігі тұрғындардың өтініші бойынша жағдайға алдын ала баға берілгенін хабарлады. Қолда бар фотоматериалдарға сәйкес, жәндіктер тарақандарға жатпайды. Болжам бойынша, бұл - барылдақ қоңыздар (Carabidae) немесе қараденелілер (Tenebrionidae).
Instagram-дағы бұл жарияланымды көру
"Бұл тұқымдасқа жататын қоңыздар топырақ пен ашық жерлердің үйреншікті мекендеушілері саналды. Жауын-шашын ұзақ уақыт бойы жауғаннан кейін топырақтың шектен тыс ылғалдануы мен орта жағдайының өзгеруіне байланысты олардың жаппай пайда болуы мен миграциясы байқалуы мүмкін. Осы кезеңде жәндіктер белсенді қозғалып, тұрғын үйлерге саңылаулар, есік ойықтары, желдеткіш тесіктері және басқа да жолдар арқылы кіреді", - деп хабарлады Ақтөбе әкімдігі.
Сондай-ақ, әкімдіктегілер масаларға, кенелерге және қарағаш жапырақжегішіне қарсы жүргізіліп жатқан дезинсекция бұл қоңыздардың санына әсер етпейтінін түсіндірді, себебі залалсыздандыру жұмыстары буынаяқтылардың басқа түрлеріне бағытталған.
"Қоңыздардың жаппай пайда болуы маусымдық әрі уақытша сипатқа ие. Мұндай құбылыстар ұзақ жауын-шашыннан кейін, топырақ температурасы мен ылғалдылығы өзгерген кезде байқалуы мүмкін. Ауа райы тұрақталған сайын қоңыздардың саны, әдетте, табиғи түрде азайып, олар өздерінің үйреншікті мекендеріне оралады", - деді әкімдік өкілдері.
Сонымен қатар билік қосымша шаралардың қабылдануын жоққа шығармайды. Шенеуніктер аталған қоңыздардың санын азайтуға бағытталған арнайы дезинсекциялық өңдеу жүргізу мүмкіндігі қарастырылып жатқанын хабарлады.
Еске салсақ, бір ай бұрын Ақтөбеде рекорд деңгейде жауын жауған болатын. Маусым айы бойы қалада жаңбыр толастамады. Әлеуметтік желілерде тұрғындар қолайсыз ауа райының салдары бейнеленген кадрларды жариялады: жаяу жүргіншілер тасқын суды кешіп өтсе, көліктер жолдың су басқан бөліктерінен әрең өтіп жатты. Видеолардың бірінде автобус аялдамасының маңында адамдардың су кешуге мәжбүр болғаны көрінеді, себебі су тротуарлар мен жиектастарды басып қалған.