Түркістан облысында екі бала суға батып кетті, - деп хабарлайды 24.kz.
Бәйдібек аудандық полиция бөліміне жергілікті тұрғын хабарласып, өзенде шомылып жүрген ұлын таппай қалғанын айтып көмек сұраған.
"Оқиға орнына Бәйдібек АПБ-нің бастығы бастаған жедел-тергеу тобы, прокуратура қызметкерлері, төтенше жағдай қызметінің қызметкерлері жедел жетіп, жан-жақты тексеру жұмыстарын жүргізді. Бірнеше сағатқа ұласқан жедел-іздестіру іс-шарасы кезінде полицейлер Бөген өзенінен 2 жасөспірімнің мәйітін тапты", - делінген хабарламада.
Полицияның мәліметінше, 16 мамырда 2012 жылғы 4 жасөспірім суға түсуге өзенге келген.
"Олар Бәйдібек ауданы Шалдар ауылындағы Бөген өзенінің 2 метр тереңдіктегі жеріне түскен. Оқиға орнын қарау барысында балалардың киімдері мен велосипедтері табылды. Бүгінде бұл дерек Бәйдібек АПБ-де тіркеліп, тексеру жүргізіліп жатыр", - деді полиция департаменті.
Сілтемесіз жаңалық оқисыз ба? Онда Telegram желісінде парақшамызға тіркеліңіз!