ҚР Мәдениет және спорт министрі Арыстанбек Мұхамедиұлы Димаш Құдайбергеннің Қытайда өтіп жатқан I am a Singer байқауының келесі кезеңінде қалай өнер көрсететінін айтты, - деп хабарлайды Tengrinews.kz тілшісі.
"Достар, жақсы жаңалық! Димаш Құдайберген Қытайдағы I am a Singer байқауында Қазақ ұлттық өнер университеті ұлттық аспаптар ансамблінің сүйемелдеуімен халық әні - "Дайдидау" әнін орындайды. ҚР Мәдениет және спорт министрінің бастамасымен ҚР ұлттық аспаптар ансамблі қазіргі уақытта Қытайда байқауға дайындалып жатыр", - деп жазды Арыстанбек Мұхамедиұлы Facebook желісіндегі парақшасында.
"Димаштың курстастарының Қытайға тек қуана барғанын айтып өткім келеді және бұл жолы Димаш бірегей ән орындайды. Балалар сахнаға арнайы тігілген ұлттық киімдерде шығады", - деді министр.
Сондай-ақ, Мұхамедиұлы Димаш Құдайбергеннің халықаралық "Славян базары" байқауына қатысқанда осы "Дайдидау" әнімен бас жүлдені жеңіп алғанын айтып өтті.
"Достар, студенттерімізге I Am a Singer байқауында сәттілік тілейік! Димашқа өз атымнан жеңіс тілеймін!", - деді Арыстанбек Мұхамедиұлы.
Еске сала кетейік, өткен сенбіде, 18 ақпанда Димаш Құдайберген I am a Singer байқауының бесінші кезеңінде өнер көрсеткен болатын. Қазақстандық әнші Димаш Құдайберген Қытайдың Hunan TV арнасындағы I am a Singer байқауының бесінші кезеңінде өнер көрсетіп, Бруно Марс пен Марк Ронсонның "Uptown Funk" атты әнін орындады. Айта кетейік, Қытайда өтіп жатқан I am a Singer байқауы 14 кезеңнен тұрады.
