Қазақстанның ең биік сарқырамасына апаратын жол қашан салынып бітеді?

Жетісу облысында Қазақстандағы ең биік сарқырама – Бурхан-Бұлаққа баратын жолдың құрылысы басталды. Tengri Travel өңір әкімдігінен толық мәліметтерді білді.

Әзірге Бурхан-Бұлаққа тек ең шыдамдылар ғана жете алады: жолсыз жерден өткеннен кейін туристерге жаяу жүруге тура келеді. Әкімдік келушілерге арналған жағдайды жақсарту және қолжетімділікті арттыру жұмыстарының басталғанын хабарлады.

"Нысанда бұрғылау-жару жұмыстары жүргізіліп, аумақ табиғи топырақтан тазартылып, сондай-ақ жол төсемінің негізін дайындау жұмыстары атқарылып жатыр. Қиыршық тас-құм қоспасынан 2,8 шақырым жол жабы төселді", - деді әкімдіктегілер.

Жалпы ұзындығы 30 шақырымға жуық жол салу жоспарланған.

"Келісімшартқа сәйкес жалпы құны 13,8 миллиард теңге болады. 2025 жылы құрылыс жұмыстарын бастауға Ұлттық қор қаражатынан 3,9 миллиард теңге бөлініп, игерілді, ал 2026 жылға жергілікті бюджеттен 1 миллиард теңге қаралды. Жолдың ұзындығы – 30,8 шақырым. Бас мердігер – "Прогресс KZ" ЖШС", - деп хабарлады Жетісу әкімдігі.

Туристік аймақ бола ма?

Сарқырама маңында демалыс күркелері мен санитарлық нысандары бар демалыс аймағын абаттандыру жоспарланған. Сондай-ақ автотұрақтар қарастырылған, ал негізгі жұмыстар аяқталғаннан кейін билік инвесторларды тартуды көздеп отыр. Жобаны 2027 жылдың аяғына дейін аяқтау жоспарланған.

Бурхан-Бұлақ сарқырамасы туралы не белгілі?

Бурхан-Бұлақ – Қазақстандағы ең биік сарқырама, оның жалпы биіктігі 168 метр болады. Ол Қора өзенінің шатқалында (Жоңғар Алатауы таулары, Ескелді ауданы) орналасқан және Текелі қаласынан 70 шақырым, Талдықорғаннан шамамен 130 шақырым жерде.