Футболдан Қазақстан чемпионы "Ақтөбе" командасы мен румыниялық "Стяуа" Чемпиондар лигасының іріктеу кезеңінің алғашқы кездесуінде тең түсті, - деп хабарлайды Vesti.kz.
Ақтөбенің Қобыланды батыр атындағы стадионында өткен кездесу 2:2 есебімен аяқталды. "Стяуа" футболшылары 44-минутта алға шықты. "Ақтөбе" қақпашысының қателігін "Стяуа" шабуылшысы Клаудиу Кесеру пайдаланып кетті. "Ақтөбеліктер" бірінші таймда белсенді ойнағанымен гол сала алмады.
58-минутта бұрыштама доптан кейінгі ойынның арқасында есеп теңесті. Маркос Пиззеллидің пасын Валерий Коробкин сәтті пайдаланды. 79-минутта Андрей Препелицэ "Стяуаның" тағы да алға шығуына жағдай жасады. Бұдан кейін "Ақтөбе" ойыншысы Роберт Арзуманян есепті қайта теңестірді.
Бұл екі команда арасындағы қарымта ойын 6 тамыз күні Бухарестегі “Стяуа" стадионында Астана уақыты бойынша 23.30-да болады. Оны KazSport арнасы тікелей көрсетеді.
Еске сала кетейік, "Ақтөбе" мұның алдында Тбилисидің "Динамосын" екі кездесудің нәтижесі бойынша 4:0 есебімен жеңген болатын. Ал "Стяуа" бұған дейін норвегиялық "Стремсгодсетті" жалпы 3:0 есебімен ұтты.
