Қазақ-қытай шекарасындағы "Қорғас" бақылау-өткізу бекетінде бір тоннадан астам дәрі-дәрмек контрабандасы әшкереленді, - деп хабарлайды Тengrinews.kz тілшісі ҚР ҰҚК Шекара қызметінің баспасөз қызметіне сілтеме жасап.
"Жасы 32-дегі әйел адам бір тоннадан астам дәрі-дәрмекті елімізге заңсыз жолмен өткізуге әрекеттенгені үшін ұсталды", - делінген хабарламада.
Қазіргі уақытта контрабанда жүгі бақылау-өткізу бекетінде. Бұл дерек бойынша ҚР Қылмыстық кодексінің 234-бабының 1-тармағына сай қылмыстық іс қозғалып, тергеу амалдары жүргізіліп жатыр. Ұсталған әйелдің қай елдің азаматшасы екені хабарланған жоқ.
Еске сала кетейік, бұған дейін қазақ-қытай шекарасында 100 келіден астам дәрі-дәрмек контрабандасының жолы кесілген болатын. "Қорғас" өткізу-бақылау бекетінің бақылаушылары елімізге дәрі-дәрмекті заңсыз өткізбек болған Қазақстанның 20 жастағы азаматын ұстады. Ол дәрі-дәрмекті елімізге жасырын жолмен өткізуге тырысқан. Аталған дерек бойынша материалдар Алматы облысы Панфилов ауданының прокуратурасына берілді.
