Сібір жарасын жұқтырған ер адам Павлодардың жұқпалы аурулар ауруханасында көз жұмды, - деп хабарлайды Tengrinews.kz тілшісі.
Дәрігерлердің айтуынша, 51 жастағы ер адам сібір жарасын жұқтырып, 17 шілдеде таңғы 06.30-да қайтыс болыпты. Бұл мәліметті Павлодар облыстық Денсаулық сақтау басқармасының жетекшісі Нұрлан Қасымов та растады. Басқармадағылар оқиғаның мән-жайын кейінірек айтып беруге уәде берді.
Еске салайық, ер адам ауруханаға облыстың Ертіс ауданынан жеткізілген еді. Науқас жансақтау бөлімінде ауыр жағдайда болды. Кейін дәрігерлер оның жағдайын тұрақтандырып, өз-өзіне келе бастағанын атап өткен.
Қазіргі уақытта Павлодардағы жұқпалы аурулар ауруханасында сібір жарасын жұқтырған тағы екі адам жатыр.