8 маусым Қазақстан президентінің сайлауы қарсаңында тыныштық күні болып жарияланды. Бүгін жасалған кез келген үгіт-насихат заңсыз саналады, - деп хабарлайды Tengrinews.kz тілшісі.
Тыныштық күні - дауыс беруге дейінгі күн, бұл күні үгіт-насихат жұмыстарын жүргізуге болмайды. Кез келген насихат кандидат немесе сайлау бірлестігі үшін зиян тигізеді.
Ел президентін сайлау 9 маусымда сағат 07.00-ден 20.00-ге дейін өтеді. Сайлау учаскелеріндегі дауыстарды санау дауыс беру аяқталған сәттен бастап 12 сағаттан кешіктірілмей жүзеге асырылады.
Әкімшілік-аумақтық бірліктер бойынша дауыстарды санау нәтижесі аумақтық комиссиялардың отырыстарында белгіленеді және ОСК-ге екі күнде (2019 жылдың 11 маусымынан кешіктірмей) жеткізіледі.
Естеріңізге салсақ, 7-12 маусым аралығында Қазақстан полициясы күшейтілген қызметке көшті. "9 маусымда сайлау күні барлық жерде 21 мыңнан аса полицей жұмыс істейді. Мұндай шаралар сайлау өтетін күндері әрдайым болады", - деп түсіндірді ішкі істер министрі Ерлан Тұрғымбаев.