18 наурыз 2023 12:28

Алматы облысындағы оқушы өлімі: туыстары бұған әлімжеттік себеп болғанына сенімді

ПОДЕЛИТЬСЯ

Алматы облысында көз жұмған 14 жастағы жасөспірімнің туыстары оның өліміне әлімжеттік себеп болды дейді, - деп хабарлайды Tengrinews.kz тілшісі КТК телеарнасына сілтеме жасап.


Алматы облысында көз жұмған 14 жастағы жасөспірімнің туыстары оның өліміне әлімжеттік себеп болды дейді, - деп хабарлайды Tengrinews.kz тілшісі КТК телеарнасына сілтеме жасап.

Олар жасөспірімді жоғарғы сыныптың оқушылары мен студенттер соққыға жыққан деп отыр. Туыстарының сөзінше, ауылдың сотқарлары өзінен жасы кіші балалардан үнемі ақша жинап күш көрсетеді екен.

Іш құрылысына зақым келген 9-сынып оқушысы үш күн бұрын ауруханада қайтыс болған. Қайғылы оқиғадан кейін қылмыстық іс қозғалып, сот-медициналық сараптама тағайындалған. Ауруханада көз жұмған 14 жастағы баланы туыстары кеше ғана жерлеген.

"Үйге келді, он жарым, он бір кезінде. Келді де, құсты. Құсқан соң жедел жәрдем шақырдым. "Міне, балаңызды көріңіз, ішектері жарылып, іріңдеп кеткен. Ішін қатты соққан, қан ұйып қалған" деді. Балам сап-сау жүрген. Осындай болады деп ойламадым", - дейді Айболат Мұратханның анасы Сайрат Ұғыбай.

Марқұмның телефонын қарап шыққан жақындары ауылдың сотқарлары өзінен жасы кіші балаларды бопсалап, үнемі ақша жинайтынын біліпті. Марқұмның ағалары ініміз таяқ жеп, ауыр жарақаттан бақилық болғанына сенімдіміз дейді.

"Марқұм болған ініміздің телефонынан жоғары сынып оқушыларының ақша сұрағанын, қанша сұрағанын, не үшін сұрағанына дейін жазылған. Біреудің Kaspi red-ін жауып берген. Біреудің машинасын жөндеуге алған. Біреуге кальян әкеп берген. Бірақ Еңбекшіқазақ ауданы полициясы бөлімінің іс-әрекеті түсініксіз. Тергеудің әділ жүргілуін сұрамаймыз, талап етеміз", - дейді марқұмның ағасы Талғат Нұрман.

Осы оқиға бойынша қылмыстық іс қозғалып, тергеу жүргізіліп жатыр. Полиция мәйітті тексеру барысында марқұмның денесінен зорлық-зомбылықтың белгілері табылмағанын жеткізді.

"Арыз ҚР Қылмыстық кодексінің 106-бабы бойынша тіркелді. Мәйітті тексеру хаттамасында баланың денесінде зорлық-зомбылықты өлім белгілері жоқ екендігі анықталды. Өлім себебін анықтау үшін қажетті сұрақтар қойылған сот-медициналық сараптама тағайындалды", - дейді Алматы облыстық полиция департаментінің ресми өкілі Ернар Сайділдин.

Баланың өліміне нақты не себеп болғаны сот-медициналық сараптама қортындысынан кейін белгілі болады. Ал баласынан айырылған отбасы тергеу әділ жүргізіліп, кінәлілердің тиісті жазасын алуын талап етеді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Читайте также
Join Telegram

Валюта бағамы

 446.44   490.7   4.77 

 

Ауа райы

 

Редакция Жарнама
Социальные сети