+7 (777) 001 44 99
Қазақша
Русский
English
Қазақша
Русский
English
Бас прокуратура Мұрат Боранбаевтың ұсталуына қатысты мәліметтерді жариялады, - деп хабарлайды Tengrinews.kz тілшісі.
Ведомствоның мәліметінше, оған қатысты қылмыстық іс 2022 жылғы қазанда Алматы бойынша экономикалық тергеу департаментінде тіркелген. Боранбаев ақылы автотұрақ жүйесін іске қосу кезінде қаржы жымқырды деген күдікке ілініп, іздеу жарияланған.
Бас прокуратура Мұрат Боранбаев ерікті түрде келгеннен кейін ұсталғанын мәлімдеді. Ол кінәсін мойындап, заңсыз жолмен алынған активтерді қайтару туралы процестік келісім жасаған. Ресми ақпарат бойынша, Алматы қаласы Алмалы аудандық сотының шешімімен Мұрат Боранбаев қылмыстық жауапкершіліктен босатылған.
Боранбаевтың ісі қалай өрбіді?
2022 жылы Қаржы мониторингі агенттігі кәсіпкер Мұрат Боранбаевқа іздеу жариялаған. Ол Алматыдағы ақылы автотұрақтарға байланысты қылмыстық істің басты фигуранты және қылмыстық схеманың ұйымдастырушысы ретінде аталды.
Мемлекеттік сатып алу сайтындағы мәліметке сәйкес, Боранбаев 2017 жылы "Alan Parking" ЖШС-нің директоры болған.
2022 жылғы сәуірде бұл компанияның директоры Мұхтар Базарбаев, кейін "Алматы спецтехпаркинг сервис" ЖШС директоры Марат Принбеков ұсталған болатын.
2023 жылғы желтоқсанда кәсіпкер Қайрат Боранбаев иелік ететін RR2 компаниясы "Alan Parking" компаниясындағы 30% үлесті сатып алғаны белгілі болды. Бұған дейін ақылы автотұрақтарды басқаратын оператор мемлекетке тиесілі еді.
Кейін Алматы қаласының әкімдігі "Алматы спецтехпаркинг сервис" компаниясының 70% үлесі мен "Alan Parking" компаниясының 100% үлесі қаланың меншігіне қайтарылғанын мәлімдеді.
Іздеу қалай тоқтатылды?
2023 жылғы күзде Мұрат Боранбаев әлі де халықаралық іздеуде болған. Сол кезде Экономикалық тергеу қызметі аса ірі көлемде мемлекеттік қаржы жымқыру дерегі бойынша соталды тергеу жүргізіп жатқанын мәлімдеген.
Алайда, Tengrinews.kz редакциясы 2022 жылы құқықтық статистика порталында жарияланған іздеу туралы ақпарат жойылғанын байқаған. Осыған байланысты ресми сұрау жолдаған.
Қаржы мониторингі агенттігі жауап ретінде:
"Боранбаев М.С.-ты іздеу 2024 жылғы 24 желтоқсанда оның ұсталуына байланысты тоқтатылды", – деп хабарлаған.
Басқа ақпарат берілмеді. Агенттік бұл сұрақ бойынша Бас прокуратура жанындағы активтерді қайтару комитетіне жүгінуге кеңес берген. Tengrinews.kz редакциясы бұл комитетке де ресми сұрау жіберген.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
