Қарағанды облысындағы "Шахтинская" шахтасында 34 жастағы үңгуші зардап шекті, - деп хабарлайды Tengrinews.kz тілшісі.
Оқиға бүгін сағат 05:00 шамасында болған. Кеніштегі бұрғылау жұмысы кезінде кен опырылып, ер адамды басып қалған.
"УПР-1 учаскесінің жұмысшылары үңгушіге алғашқы медициналық көмек көрсетті, кейін ол шахтаның үстіне шығарылды және шокқа қарсы реанимациялық бригада Қарағандыдағы Мақажанов атындағы емханаға жеткізді", - деп хабарлады "АрселорМиталл Теміртау" баспасөз қызметі.
Бұл дерек бойынша Қазақстан Республикасы Қылмыстық кодексінің 277-бабының 1-бөлігі "Тау-кен жұмыстарын немесе құрылыс жұмыстарын жүргізу кезінде қауіпсіздік ережелерін бұзу" бойынша қылмыстық іс қозғалды. Қарағанды облыстық полиция департаменті сотқа дейінгі тергеу басталғанын хабарлады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
