Қазақстанның, Ресейдің және әлемнің өнер жұлдыздары Астанада EXPO-2017 халықаралық көрмесінің туын қабылдау салтанатына орай тегін концерт береді. Мерекелік шара 21 маусым күні болады, деп хабарлайды Tengrinews.kz "Инфо-Цес" порталына сілтеме жасай отырып.
Салтанатты шара аясында Астанада екі концерт өтеді. Біріншісі – 18.00-де "Қазақстан" орталық концерт залында. Бұл концертте Әлібек Дінішев, Дмитрий Хворостовский, Валерия және басқалар ән шырқайды. Екіншісі – 19,00-де "Сарыарқа" велотрегінде өтеді. Бұған Юлия Ковальчук, Шон Пол, Араш, Нюша, Алексей Чумаков, Виктория Дайнеко, "Серебро", Rin’Go тобы қатысады.
EXPO-2017 сайтында тегін билеттерді "Мега", "Керуен" сауда орталықтарында, "Сарыарқа", Конгресс-холл, "Қазақстан" ОКЗ, "Жастар" сарайында алуға болатыны хабарланған.
Естеріңізге сала кетейік, EXPO-2017 халықаралық көрмесі Астанада 2017 жылы өтеді. Көрменің тақырыбы – "Болашақтың энергиясы". Көрмеге 100 мемлекет және халықаралық ұйымдар, 2-3 миллион адам қатысады деп күтілуде. Көрменің барлық құрылыс нысандары 2016 жылдың соңына қарай аяқталмақ.
