13 мамыр 2018 12:06

Ғалымдар жаһандағы азық-түлік тапшылығын жоюдың жолын ұсынды

Италия ғалымдары жаһандағы азық-түлік тапшылығы мәселесіне өз шешімін ұсынды, деп хабарлады "Хабар 24".

Телеарнаның хабарлауынша, жер бетінде халық саны артқан сайын азық-түлік мәселесі де өзекті болып келеді. Жаһан жұртына азық қайдан табылады?

Ғалымдар мәселесіні шешудің бір жолы жаңа азық-түлік өнімдерін шығару дейді. Еуропалықтар медузаға көшкен жөн, деп отыр.

Cұйық қамырда пісірілген медуза. Мұндай таңсық тағам түрі әзірге мейрамханаларда жоқ. Бірақ теңіз жәндігін пісіру түк қиын емес дейді азық-түлік саласының сарапшысы Франческо Лорето. Оның айтуынша, жоғарғы температурада медузадағы барлық улы заттар жойылады.

"Медуза салмағының 95 пайызы судан тұрады. 3-4 пайызын протеин, әсіресе коллаген құрайды. Сондықтан егер адамдар медузаны тағам ретінде пайдаланатын болса, ол протеин көзі ретінде денсаулыққа өте пайдалы ас түріне айналуы мүмкін", - деді Италияның Ұлттық зерттеу кеңесі департаментінің директоры Франческо Лорето.

Италия ғалымдары Германия, Норвегия, Португалия және басқа елдермен бірлесіп "Гоу Джелли" деп аталатын еуропалық ғылыми жобамен айналысып жатыр. Олар медузаны зерттеуге кірісті. Мақсаты - теңіз жәндігінің косметика, тыңайтқыш, тазалағыш фильтр жасау және азық-түлік өндірісінде пайдаланудың жолдарын қарастыру.

Қазір Жер шарында медузаның 200-ден астам түрі бар, кейбірінің ұзындығы 2,5 метрге дейін жетеді. Олар мұхит, теңіздерде көптеп кездеседі, оның үстіне соңғы жылдары медуза популяциясы өсіп келеді.

"Медузамен қоректенетін жыртқыштар саны азайды, сондықтан олар тез көбейіп жатыр. Бұған әсер ететін тағы бір фактор бар. Ол климаттың өзгеруі. Жылы су олардың өсіп-өнуіне көп септігін тигізеді. Егер де адамдар бұл жәндікті тағам ретінде тұтынатын болса, экожүйедегі тепе-теңдікті сақтап қалуға болар еді", - деді Marevivo экологиялық ассоциясының маманы Федерико Ди Пента.

Айта кетейік, жаңа азықты, яғни балдырлар мен түрлі жәндіктерді сатуға Еуроодақ биыл ресми түрде рұқсат берді. Ал Оңтүстік-Шығыс Азия тұрғындары үшін медузадан жасалған тағамдар таңсық емес. Сарапшылардың айтуынша, болашақта медуза таптырмас ақуыз көзіне айналады.