Қытайлық жанкүйерлер қазақстандық әнші Димаш Құдайбергенге өзінің және отбасының сувенирлерін сыйға тартты, - деп хабарлайды Tengrinews.kz тілшісі әншінің PR-директоры әрі жақын досы Алпамыс Шаримовқа сілтеме жасап.
Шаримовтың айтуынша, әнші қытайлық жанкүйерлерімен кездескен. Осы кездесуде тыңдармандар Димаш Құдайбергеннің және оның отбасының сувенирлері шыққанын айтып, өзіне сыйлаған. Жанкүйерлер әншінің ата-анасын сағынып жүргенін ойлап, осындай сый жасағанын айтыпты. "Қаншадан сатылып жатырғанын білмейміз. Фанаттар келіп "Димаш үйдегілерін сағынып жүр ғой" деп осындай сыйлықтар сыйлады", - деді әншінің өкілі.
Сонымен қатар, әншінің жанкүйерлері балалар үйіне барып, Димаш Құдайбергеннің атынан қайырымдылық жасапты. Фан-топ өкілдері балаларға азық-түлік, дәмді тамақтар мен сүт апарып берген екен.
Сый-сыяпатпен қатар, балаларға Димаш Құдайбергеннің тілегі жеткізілген. Тілекте "Сендердің аман-есен ер жетулеріңді тілеймін. Димаш Құдайберген" деген жазу қытай және қазақ тілінде жазылған. Ал төменде фан-топтың атынан "Балақайлар, сүтті көп ішсеңдер Димаш ағаларың сияқты талантты болып ер жетесіңдер" деп жазылған.
Димаш Құдайбергеннің сүт ішіп отырғаны бейнеленген суреттің сүт ыдыстарының үстіне жабыстырылып, балаларға таратылыпты.
© Алпамыс Шаримов
