+7 (777) 001 44 99
Қазақша
Русский
English
Қазақша
Русский
English
Қазақстандық кәсіпқой боксшы, IBO тұжырымы бойынша әлем чемпионы Ангелина Лукас жақын арада оның есімі Гиннестің рекордтар кітабына ресми түрде енгізілетінін мәлімдеді, - деп хабарлайды Tengrinews.kz тілшісі.
Бұған дейін тараздық спортшы қыз өз мақсаты – әлемдік рекордты жаңартып, Гиннестің кітабына ену екенін айтқан болатын. Енді бұл арманы орындалуға жақын.
"Биыл рекорд орнаттым, енді жақында ресми түрде тіркеледі. Бұл мен үшін үлкен мотивация болды. Соңғы кезде менің әлемдік рейтингім өспей қалған соң, өзіме бірнеше жекпе-жекті қатар өткіземін деген мақсат қойдым. Командам бұған қарсы болды. Барлығы бұл өте қиын, денең қалпына келмей қалады деп айтты. Бірақ мен дайын болдым. Себебі мен үнемі жақсы формадамын. Мысалы, түн ортасында оятып, "ертең жекпе-жек" десе де, мен шығамын. Бұл – мен үшін ғана емес, командам мен отбасым үшін де маңызды", – дейді Ангелина.
Ол кейбір спортшылардың жарты жыл бойы дайындалмай, тек бір жекпе-жекке ғана күш салатынын, ал өзі керісінше – қарқынын арттыра түскен сайын жақсы нәтиже көрсететінін айтты.
"Мен үшін тоқтамау маңызды. Дегенмен денсаулықты да бақылауда ұстаймыз. Биыл қанша жекпе-жек өткізетінімді нақты білмеймін, бірақ әзірге өзімді өте жақсы формада ұстап, дайындықты жалғастырып жүрмін", – деді Лукас.
Айта кетейік, Ангелина Лукас қатысқан соңғы жекпе-жек жанжалмен аяқталған. Ол 21 ақпанда Түркияның Стамбул қаласында өткен RMO Boxing турнирінде өтті.
Бұл кездесуде Лукас IBO тұжырымы бойынша әлем чемпионы атағын қорғап, Боливиядан келген қарсыласы Йисения Токоны екінші раундта техникалық нокаутпен жеңді.
Алайда, жекпе-жек барысында Лукас бірнеше мәрте ереже бұзған: қарсыласын тістегені және желкеден ұрғаны байқалған. Соған қарамастан, төрешілер бұл ереже бұзушылықтарды ескермей, жеңісті Лукасқа берді.
Сонымен қатар, қос раундта да Лукас рефери ескертулеріне бағынбай, тек физикалық араласудан кейін ғана тоқтаған. Ал жекпе-жектен кейін қарсыласы сыпайылық танытып, қол созғанда, Лукас оны итеріп жіберіп, құрметсіздік көрсеткен.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
