АҚШ Қарулы күштерінің Орталық қолбасшылығы (CENTCOM) Оман шығанағы маңында америкалық күштердің Иран туы ілінген танкерге шабуыл жасағанын мәлімдеді, - деп хабарлайды Tengrinews.kz тілшісі.
X әлеуметтік желісінде жарияланған мәлімдемеге сәйкес, Hasna танкері халықаралық су арқылы Иран портына қарай бет алған кезде бақылауға алынған. Америкалықтар кемеге блокаданы бұзғаны туралы ескерту жасаған.
"Hasna экипажы бірнеше мәрте жасалған ескертуді орындамағаннан кейін, америкалық күштер танкерді істен шығарды. Ол үшін USS Abraham Lincoln (CVN 72) әуе кемесінен көтерілген АҚШ Әскери-теңіз күштерінің F/A-18 Super Hornet ұшағы 20 миллиметрлік зеңбіректен бірнеше рет оқ атты. Hasna енді Иранға қарай қозғалысын жалғастырмайды", - делінген жарияланымда.
Қолбасшылық өкілдері Иран порттарына кіруге немесе ол жерден шығуға тырысқан кемелерге қарсы америкалық блокада әлі де күшінде екенін айтты.
АҚШ Әскери-теңіз күштері Ормуз бұғазындағы блокаданы 13 сәуірде бастаған. Вашингтонның мәлімдеуінше, Иранмен байланысы жоқ кемелер, егер Тегеранға өту үшін ақы төлемеген болса, бұғаз арқылы еркін өте алады.
