АҚШ пен Иран Ормуз бұғазын ашуды, сондай-ақ Тегеранның жоғары байытылған уран қорынан арылу міндеттемесін қарастыратын ықтимал мәмілеге келді. Бұл туралы The New York Times телеарнасының сюжетінде айтылды, деп хабарлайды Tengrinews.kz.
Америкалық жоғары лауазымды шенеуніктің айтуынша, келісім Таяу Шығыстағы қақтығыстың деэскалациясына әкелуі мүмкін, алайда құжаттың екі ел басшылығы тарапынан түпкілікті мақұлдануы тағы бірнеше күнге созылуы ықтимал.
Басылым уағдаластықтың егжей-тегжейі әзірге белгісіз екенін атап өтті, өйткені акватория арқылы кемелер қозғалысын қаншалықты тез қалыпқа келтіру мүмкін болатыны әлі түсініксіз. Сондай-ақ бұл келісім Ислам Республикасының бұғаз үстінен бақылауды сақтап қалуын қарастыра ма, жоқ па, ол жағы да беймәлім.
Иранның ресми өкілдері әзірге ықтимал келісімнің мән-жайына қатысты жария түрде пікір білдірген жоқ.
Сонымен қатар жексенбі күні Fox News телеарнасы АҚШ пен Иран негіздемелік келісімді 95 пайызға келістірді, алайда келіссөз жүргізушілер Тегеранның ядролық арсеналы мен Ормуз бұғазын бақылау мәселелеріне қатысты тұжырымдарды талқылауды жалғастырған.
"Біз берілмек емеспіз. Біз әлі келісімге келген жоқпыз. Бүгін немесе ертең келісімге қол қоюды жоспарлап отырған жоқпыз", - деп келтіреді телеарна АҚШ әкімшілігі өкілінің сөзін.
Сондай-ақ өкіл ядролық арсенал мен Ормуз бұғазы бойынша келісімге қол жеткізілгенін, бірақ тұжырымдардың егжей-тегжейі талқыланып жатқанын нақтылады. Ол АҚШ әкімшілігі Вашингтон үшін шығындарды азайтатын, сонымен бірге Тегеранның ядролық қаруға ие болуына жол бермейтін мәміле жасасу мүмкіндігін көріп отырғанын айтты.
Келісімге қол жеткізу мүмкін болмаған жағдайда, АҚШ өкілдері соғыс қимылдарын қайта бастау құқығын өзіне қалдырады.
Axios порталының хабарлауынша, Вашингтон мен Тегеран жақын арада өзара келісім бойынша ұзарту мүмкіндігі бар 60 күндік өзара түсіністік туралы меморандумға қол қоюы мүмкін. Ол бітімгершілікті жалғастыруды қарастырады. Сонымен қатар Штаттар ирандық порттардан блокаданы алады деп күтілген болатын. Бұдан бөлек, құжат Тегеранның ядролық қару жасамау міндеттемелерін қамтиды.
Мәліметтерге сәйкес, екі ай ішінде Ормуз бұғазы өту ақысын алмай ашылады, ал Иран бағытты миналардан тазартуға келіседі. Таяу Шығысқа жіберілген америкалық әскерилер қорытынды мәміле аяқталғанға дейін сонда қалады.
