Италиядағы қазақстандық студенттің қазасына қатысты жаңа мәлімет шықты

Италиядағы қазақстандық студенттің қазасына қатысты жаңа мәлімет белгілі болды, - деп хабарлайды Tengri Travel.

Diemmecom Società мәліметінше, марқұмның денесі Италияның оңтүстігіндегі Вибо-Валентия провинциясында, Бриатико коммунасының жағалауынан табылған.

Студент таңертең жағалаудағы жартастар арасынан байқалған.

"Қаза тапқан сырт келбеті еуропалыққа ұқсас, жасы 20 мен 30-дың аралығындағы ер адам болып шықты, оның кім екені әзірге анықталған жоқ. Оның шашы ұзын болғандықтан, құтқарушылар жаңылысып, бастапқыда әйел деп болжаған", - деп хабарлайды басылым.

Мамандардың алдын ала тұжырымына сәйкес, марқұмның денесі табылғанға дейін шамамен он бес сағат бұрын жан тапсырған болуы мүмкін. Алғашқы тексеру кезінде сарапшылар жарақат іздерін таппаған.

Тергеудің алдын ала нұсқасы бойынша, өлімнің себебі суға бату болуы мүмкін. Дегенмен түпкілікті қорытынды барлық қажетті сараптама мен тергеу шаралары аяқталғаннан кейін шығарылады.

Сондай-ақ қаза тапқан адамның жанынан ұялы телефон табылғаны хабарланды. Сонымен қатар маңайдағы жартастар ішінде белге тағатын сөмке мен кейбір киім-кешектері бар пакет табылған.

Тергеу жалғасып жатыр. Құқық қорғау органдары қаза тапқан адамның кім екенін анықтап, оқиғаның мән-жайын зерттеп жатыр. Қазіргі уақытта өлімнің себептері мен мән-жайы туралы ресми қорытынды әлі жарияланған жоқ.

Еске салайық, бұған дейін әлеуметтік желілерде Қазақстаннан барған студенттің қаза болғаны туралы ақпарат пайда болған еді. Туыстары марқұмның сүйегін елге тасымалдау кезінде қиындықтарға тап болғаны және шығындардың жалпы сомасы шамамен 8000 еуроны құрағаны хабарланды.

СІМ қаза тапқан адамның жақындары мен туған-туыстарына көңіл айтып, дипломаттардың қажетті қолдау көрсетіп жатқанын хабарлады. Қазіргі уақытта оқиғаның мән-жайы анықталып жатыр.