+7 (777) 001 44 99
Қазақша
Русский
English
Қазақша
Русский
English
Бүйірден соғатын жел аяқ-асты пайда болады. Оны алдын ала білу мүмкін емес. Мысалы, көпірден, ғимараттан шыққан кезде немесе жүк көлігін басып озғанда. Бұл жағдайда жүргізушілер тізгінге ие бола алмай, жолдан шығып кетуі мүмкін. Бұл көп жағдайа тасжолдарда қауіпті саналады, - деп хабарлады Tengri Auto.
"ҚазАвтоЖол" мәліметінше, мұндай жағдай тіпті тәжірибелі жүргізушіге де тосын болуы мүмкін, ал жаңадан рөлге отырғандар үшін одан да қауіпті. Жел қозғалыс бағытын күрт өзгертуі ықтимал.
Көбірек қауіп төнетіндері:
- биік шанағы бар жеңіл көліктер;
- шатырында жүксалғышы бар машиналар;
- жүк көліктер;
- тиегіштер мен автокемперлер;
- мотоциклшілер.
Қай жерде жел жиі соғады?
- ашық жазық жерлерде (дала, егістік алқаптар);
- көпірлер мен жол өткелдерінде;
- орманнан немесе туннельден шыққан кезде;
- фуралар мен автобустар сияқты ірі көліктердің жанында.
Жүргізуші не істеу керек?
- Жылдамдықты азайтыңыз. Сақтықта қорлық жоқ. Жоғары жылдамдықпен келе жатқан көлік үшін жел қауіпті.
- Рөлді берік ұстаңыз. Әсіресе түзу жолда. Жел кезінде екі қолмен мықтап ұстаңыз.
- Басып озғанда абай болыңыз. Жүк көліктерін басып озғанда алдымен жел бәсеңдегендей болады, кейін кенеттен қатты соғады. Бұл сәтте көлік шайқалып кетуі мүмкін. Осындай жағдайға дайын болыңыз.
- Қашықтықты сақтаңыз. Жел алдыңыздағы көлікті, әсіресе мотоциклді немесе жүк көлікті шайқап жіберуі мүмкін. Арақашықтықты ұлғайтыңыз.
- Кенеттен қимыл жасамаңыз. Бүйірден соғатын жел кезінде кенеттен рөлді бұрсаңыз, көлік сырғуы мүмкін. Асықпай, сенімділікпен қозғалыңыз.
- Терезелерді жабыңыз. Ашық терезелер қозғалысқа кедергі келтіреді. Терезелер жабық болса, басқару жеңіл болады.
"Бүйірден соғатын жел жаңбыр (жолдың тайғақ болуы), қар (ілінісудің азаюы) жауғанда және нашар көру (шаң, тұман) кезінде қауіпті. Мұндай жағдайда сапарды кейінге қалдырған жөн немесе басқа балама жолды қарастыру керек".
Ауа райы тым қолайсыз болса не істеу керек?
- Жолдың шетіне тоқтап, апаттық жарықты қосып, желдің басылғанын күтіңіз;
- Үрейге берілмей, өзіңізге сенімді болыңыз;
- Ауа райын бақылап отырыңыз, әсіресе далалық немесе таулы жолдармен жүретін болсаңыз.
