Tengri FM Радиосы Радио Жұлдыз FM Қазақстан заңдары Экономика сабақтары
KZ RU EN
Бізге жазба жолдау +7 (727) 388 8124
искать через Tengrinews.kz
искать через Google
искать через Yandex
USD / KZT - 333.32
EUR / KZT - 392.58
CNY / KZT - 50.02
RUB / KZT - 5.64

Кәсіпқой боксқа ауысуы мүмкін деген қазақстандық боксшылардың тізімі жасалды

21 Қыркүйек 2016, 10:03
2
© Massaget.kz
© Massaget.kz

Massaget.kz басылымы кәсіпқой боксқа ауысуы мүмкін деген қазақстандық боксшылардың тізімін жасады. 

Басылымның мәліметінше, 91 келіге дейінгі салмақта Рио Олимпиадасының күміс жүлдегері атанған Василий Левитті кәсіпқой бокстың шаршы алаңынан көріп қалуымыз мүмкін. Бразилиядағы доданың финалынан кейін қазақстандық боксшыны әлем тани түсіп, спорт саңлақтарының назарын аударды. Атақты америкалық промоутер Эл Хеймонның ұсыныс жасауы мүмкін екендігі де айтылды.

Айта кетейік, Василий Левит 28 жаста. Кәсіпқой боксқа жасы мен тәжірибесі сұранып-ақ тұр. Рио Олимпиадасы мен "Astana Arlans" сапындағы шеберлігін бағалаған спорт мамандары отандасымызды нағыз кәсіпқой боксқа дайын тұлға ретінде бағалауда. Ал Олимпиадаға дейінгі сұқбаттарының бірінде Василий "кәсіпқой боксқа жақсы ұсыныстар түссе, неге бақ сынап көрмеске?", - деген еді.

Сонымен қатар, Риода Олимпиада чемпионы атанған Данияр Елеусіновтің те кәсіпқой боксқа ауысуы мүмкін екені айтылып, жазыла бастады. Boxing News порталы ағасы Дәурен Елеусіновке қосылып, Лу Ди Белланың қол астында өзінің кәсіпқой бокстағы мансабын бастауға ниетті екенін жазды. Ал боксшы бұл тақырыпқа қатысты ресми мәлімдеме жасаған жоқ. Оралға барған сапарында кәсіпқой боксқа ауысу туралы ұсыныстың түскенін, әлі нақты шешім қабылдамағанын айтты.

Айта кетейік, ұлттық құрама капитаны әуесқой бокста талай белестерді бағындырды. Данияр халықаралық жарыстарды қоспағанда, Азия, әлем және Олимпиада чемпионы атанған еді.

Олимпиада ойындары аяқталғаннан кейін мансабынан бөлек, жеке өміріне көп көңіл бөлуді көздеген Әділбек Ниязымбетовты де кәсіпқой бокстан көріп қалуымыз мүмкін. Дегенмен бұл боксшы да түскен ұсыныстарға қарайтыны анық.

"Келесі Олимпиадаға қатысу туралы шешім қабылдаған жоқпын. Жетістік бар, жетпегеніне тағы ұмтылу керек. Біраз тыныққаннан кейін, жаттықтырушыммен кеңесіп көретін боламын. Кәсіпқой боксқа ауысу туралы да әлі ойланғын жоқпын", - деді боксшы Риодағы додадан кейінгі сұқбаттарының бірінде.

Аса ауыр салмақта жұдырықтасатын қазақстандық боксшы Иван Дычко да кәсіпқой бокстан ұсыныстар түсіп жатса, кетәрі емес. Жақын күндері жаттығуын бастайтын отандасымыз қандай шешім қабылдайтыны әзірге белгісіз. Ол Токиода да топ жаруды көздеуі мүмкін.

Сондай-ақ, "Astana Arlans" клубы сапында 2013 жылдан бері жұдырықтасып келе жатқан Мейірім өзін сан қырынан танытты. Талай қауқарлы қарсыластарын қапы қалдырып, командасына маңызды ұпай сыйлады. Дегенмен ұлттық команданың негізгі құрамына көп іліге алған жоқ. Өйткені, 75 келіге дейінгі салмақта Жәнібек Әлімханұлы бар.

Мейірім Нұрсұлтанов - еңбекқор, намысқой боксшы. Оны осыған дейінгі жекпе-жектерінен-ақ көріп, байқап жүрміз. Бүгінде Мейірім қазақстандық кәсіпқой боксшылар Мадияр Әшкеев және Асxат Уәлиxановпен бірге "Main Event" промоутерлігінде жаттығып жүр. Бәлкім, кәсіпқой бокстағы алғашқы жекпе-жегі көп күттірмесе керек.

Бүгінде қазақстандық боксшы қыздар да кәсіпқой шаршы алаңда бақ сынауды мақсат тұта бастады. Оның айқын дәлелі ретінде Фируза Шарипованы айтуға болады. Ал екі дүркін әлем чемпионы Назым Қызайбай бұл жолды таңдар ма екен әлі белгісіз.

Назымға танымал промоутер Сергей Завилейский ұсыныс жасағаны туралы осыған дейін ақпарат құралдарында жазылды. Дегенмен қазақ қыздарынан шыққан тұңғыш әлем чемпионы Олимпиадада бақ сынағысы келетіні жасырын емес.

"Қазақ жанкүйерлері басқа-басқа бокстың болашағына зор үмітпен қарайды. Келешекте намысты қолдан бермес, шаршы алаңда атой салатын чемпиондардың шығатынына шүбәміз жоқ. Қазақтың қайсар ұлдары мен қыздары әуесқой бокс шаршы алаңдарында ғана әлемді мойындатпай, кәсіпқой бокс ареналарында да абыройымызды асқақтатарына сеніммен қараймыз", - деп жазады басылым тілшісі.


Нравится
Поделиться
Пікірлерді көру (2)
Оқылып жатыр
Талқыланып жатыр
Бүгін
Апта
Ай