Сәуір айында Ұлттық қауіпсіздік комитеті (ҰҚК) полициямен бірлесе және прокуратураның үйлестіруімен Алматы мен Шымкент қалаларында, сондай-ақ бірқатар облыста жедел-іздестіру іс-шараларын жүргізді. Нәтижесінде қарудың заңсыз айналымына тосқауыл қойылып, ондаған қару-жарақ пен оқ-дәрі тәркіленген, деп хабарлайды Tengrinews.kz.
Барлығы 63 қару тәркіленген. Олардың ішінде 4 Калашников автоматы, 38 мылтық, 20 тапанша, РШГ-2 реактивті шабуылдаушы граната атқышы, сондай-ақ 4 граната мен 188 оқ-дәрі бар.
Шығыс Қазақстан облысында қосымша өнеркәсіптік жарылғыш зат анықталып, тәркіленген. Оның жалпы салмағы 346,5 келіні құраған.
ҰҚК баспасөз қызметінің фотосы
Барлық анықталған факті бойынша жедел-тергеу іс-шаралары жүргізіліп жатыр. Ведомство Қылмыстық-процестік кодекстің 201-бабының талаптарына сүйене отырып, өзге мәліметтерді жарияламады.
Еске сала кетейік, наурыз айының соңында ҰҚК заңсыз айналымнан 118 қарудың тәркіленгенін хабарлаған болатын. Олардың ішінде 6 Калашников автоматы, 83 мылтық және 29 тапанша бар.