Польша Қазақстанға есірткі саудасымен және қылмыстық табыстарды заңдастырумен айналысқан трансұлттық қылмыстық топты ұйымдастырды және басқарды деп күдіктелген шетелдікті экстрадициялады, деп хабарлайды Tengrinews.kz Бас прокуратураға сілтеме жасап.
Польша Қазақстанға есірткі саудасымен және қылмыстық табыстарды заңдастырумен айналысқан трансұлттық қылмыстық топты ұйымдастырды және басқарды деп күдіктелген шетелдікті экстрадициялады, деп хабарлайды Tengrinews.kz Бас прокуратураға сілтеме жасап.
Украина азаматын экстрадициялауды Қазақстанның Польшадағы елшілігінің қолдауымен Бас прокуратура мен ІІМ Интерпол қызметкерлері жүзеге асырды.
"Қылмыстық істі тергеу барысында арнайы прокурорлар аталған тұлғаның трансұлттық қылмыстық топтың жетекшісі бола отырып, Telegram мессенджеріндегі Kaef Mafia интернет-дүкені арқылы есірткі құралдары мен психотроптық заттарды жүйелі түрде жанасусыз өткізуді ұйымдастырғанын анықтады", - делінген хабарламада.
Арнайы прокурорлар тергеу барысында қылмыстық схемада пайдаланылған банктік шоттар арқылы 2,8 миллиард теңгеден астам қаражат өткенін анықтады. Бұл қаражат Қазақстаннан тыс жерлерге шығарылған, алайда кейіннен мемлекет пайдасына тәркіленді.
Сонымен қатар жедел іс-шаралар кезінде топ мүшелерінен 1,2 келіден астам есірткі құралдары мен психотроптық заттар алынды.
"Қылмыс жасалғаннан кейін топ мүшелерінің бір бөлігі сотталды, ал оның ұйымдастырушысы болған күдікті қылмыстық қудалау органдарынан жасырынып, соған байланысты халықаралық іздеуге жарияланған болатын. Өткен жылдың желтоқсан айында ол Польша аумағында ұсталды", - деп хабарлады Бас прокуратура.
Қазіргі уақытта күдікті тергеу изоляторына қамалды. Оған тағылған қылмыстарды жасағаны үшін мүлкі тәркіленіп, 20 жылға дейінгі мерзімге бас бостандығынан айыру жазасы қарастырылған.
Еске сала кетейік, 2025 жылдың желтоқсанында Ұлытау облысында есірткі саудасымен айналысқан Kaef Mafia Telegram-дүкенінің қызметі тоқтатылған болатын. Ол кезде құқық қорғау органдары қылмыстық схеманың алты қатысушысын ұстады. Сот шешімімен мемлекет пайдасына 3,2 миллиард теңгеден астам сомаға активтер, соның ішінде цифрлық активтер, криптоәмияндар мен өзге де мүліктер өндірілді.
