Миллениалдарды зумерлерден ерекшелейтін қарапайым дағды аталды

Аға буын өкілдері үшін үйреншікті саналатын тұрмыстық дағдылар біртіндеп өткеннің еншісіне кетіп барады. Қазіргі жасөспірімдер мен жастардың жартысынан астамы кәдімгі тілшелі сағатпен уақытты анықтай алмайды, ал әрбір екіншісі күйіп кеткен шамды ауыстыру кезінде қиындықтарға тап болады, деп хабарлайды Tengri Life тілшісі "Газета" басылымына сілтеме жасап.

Sunlight зерттеуі осындай тұжырымға келді. Сарапшылар жастардың күнделікті дағдылары қалай өзгеретінін және тұрмысты цифрландырудың қандай салдары бар екенін зерделеді.

Миллениалдардың қолынан не келеді және зумерлер не нәрсені ұмытып барады?

Зерттеу деректеріне сәйкес, ата-аналар жасөспірімдер мен жастардың алғашқы қарағанда қарапайым көрінетін заттардан жиі қиналатынын айтады. Үлкен буынның нұсқасы бойынша "ұмытылған дағдылардың" тізімі мынадай:

• 86 пайыз - карта қосымшаларынсыз қала ішінде бағдарлай білу;
• 73 пайыз - көбейту кестесін білу және ойша есептей алу;
• 70 пайыз - қағаз ақшаны санау және қолма-қол төлеу кезіндегі қайтарымды есептеу;
• 54 пайыз - тілшелі сағат бойынша уақытты анықтай білу;
• 49 пайыз - шамды өз бетінше бұрап орнату қабілеті;
• 31 пайыз - көрпе тысын жаймадан ажырата білу;
• 24 пайыз - "перстень" (жүзік) дегеннің не екенін түсіну.

Аға буын мен зумерлердің өздері не ойлайды?

Сауалнама мәселені қабылдау тұрғысында айтарлықтай алшақтық барын көрсетті.

Ересектердің 87 пайызы ұрпақтар арасындағы алшақтық барған сайын айқындала түседі деп есептейді. Ал жастар бұған сабырлы қарайды: зумерлердің тек 18 пайызы ғана өз қатарластарының бұрын іргелі білім саналған нәрселерді білмейтініне таңғалады.

Қызықтысы, зумерлердің өздері қиындықтарды сәл басқаша бағалайды:

• 75 пайыз - қолма-қол ақшамен және қайтарыммен жұмыс істеуді қиын деп санайды;
• 68 пайыз - карта мен навигаторсыз бағдарлауды;
• 49 пайыз - сағат циферблатын оқуды;
• 45 пайыз - көбейту кестесін білуді;
• тек 17 пайыз - көрпе тысын жаймадан сенімді түрде ажырата алады.

Бұл ретте циферблаты бар классикалық сағаттар жастардың өмірінен жоғалып кеткен жоқ. Бірақ олардың рөлі өзгерді. Қазір бұл уақытты білу құралы емес, көбінесе аксессуар және имидж элементі. Ал дәлдік пен қолайлылық үшін олар бұрынғыша смартфонға жүгінеді.

Зумерлер тұрмыстық дағдыларды қалай үйренеді?

Зерттеу мәліметтері бойынша, бүгінде тұрмыстық білім алу арналары келесідей бөлінген:

• интернет (62 пайыз) - нұсқаулықтардың, мәтіндік нұсқаулар мен бейнесабақтардың негізгі көзі;
• нейрожелілер мен жасанды интеллект (46 пайыз) - жастардың жартысына жуығы жедел жауап алу үшін осыларға жүгінеді;
• ата-аналар (42 пайыз) - танымалдылық бойынша тек үшінші орынға сырғыған;
• жақын туыстар (31 пайыз) - әжелер, аталар және аға-әпкелер;
• мектеп (18 пайыз) - өмір қауіпсіздігі негіздері, бейнелеу өнері және еңбек сабақтары тек әрбір бесінші жасөспірімге ғана ересек өмірге қажетті қолданбалы дағдыларды береді.

Сарапшылар цифрлық құралдар тәжірибе алмасудың дәстүрлі әдістерін біртіндеп ығыстырып жатқанын атап өтті. Оқу жылдам әрі ыңғайлы бола түскенімен, бұл процесс тікелей практикамен және дағдыларды отбасылық желі арқылы берумен барған сайын аз байланысты болып барады.