1. Басты
  2. Біл
  3. Техно
  4. Даму

Былтыр "Цифрлық Қазақстан" мембағдарламасын іске асыруға қанша қаражат жұмсалды?

© egov.kz © egov.kz

ҚР премьер-министрі Асқар Маминнің төрағалығымен өткен Үкімет отырысында "Цифрлық Қазақстан" мемлекеттік бағдарламасын іске асыру барысы қаралды, - деп хабарлайды Тengrinews.kz тілшісі Үкімет баспасөз қызметіне сілтеме жасап.

ҚР цифрлық даму, инновациялар және аэроғарыш өнеркәсібі министрі Асқар Жұмағалиев 2019 жылы "Цифрлық Қазақстан" мемлекеттік бағдарламасын іске асыруға 18,7 миллиард теңге бөлінгенін, ол толығымен игерілгенін мәлімдеді.

2018-2019 жылдары цифрландыру бойынша жүзеге асырылған іс-шаралар 802,5 миллиард теңге көлемінде экономикалық тиімділік әкелді, инновациялық экожүйеге 32,8 миллиард теңге тартылды және іргелес салаларды ескере отырып, 120 мың жұмыс орны құрылды.

"Елбасы Нұрсұлтан Әбішұлы Назарбаев пен Мемлекет басшысы Қасым-Жомарт Кемелұлы Тоқаев цифрландыруға ерекше көңіл бөледі. Үкіметтің кеңейтілген отырысында Мемлекет басшысы цифрландыру саласындағы жұмыстың маңыздылығын атап өтіп, бұл бағытты нақты түпкілікті нәтижеге қол жеткізумен жеделдетуді тапсырды", - деді Мамин.

Премьер-Министр 2019 жылы мемлекеттік органдардың ақпараттық жүйелерін интеграциялау жоспарының орындалмауына ішкі істер, денсаулық сақтау, индустрия, ұлттық экономика және қорғаныс министрліктері жол бергенін атап өтті.

"Бұл жұмысты ерекше бақылауға алып, оны 1 наурызға дейін аяқтау қажет. Барлық мемлекеттік органдардың басшылары ақпараттық жүйелердің уақытылы бірігуі мен олардың үздіксіз жұмыс істеуі үшін дербес жауапты орынбасарды бекітуі тиіс", - деді Үкімет басшысы.

Премьер-министр биыл мемлекеттік қызметтерді автоматтандырудың 90 пайыз деңгейіне жетуді тапсырды. Мемлекеттік органдар қысқа мерзім ішінде мемлекеттік қызметтер тізіліміне қажетті өзгерістерді, оның ішінде 20 мемлекеттік қолдау шаралары бойынша өзгерістерді пысықтап, енгізуі қажет.

Үкімет басшысы халықты жоғары жылдамдықты интернетпен қамтамасыз ету жұмысының ұзаққа созылып кеткенін атап өтті.

"Nur Otan" партиясының 250 адамнан асатын халқы бар елді мекендерді жоғары жылдамдықты интернетпен қамтамасыз ету жөніндегі сайлауалды бағдарламасының іс-шараларын іске асыру аясында байланыс операторларымен жұмыс кестесі әлі күнге дейін бекітілмеген. Партия өкілдері мен Парламент депутаттары тарапынан бұл мәселе бойынша сын да айтылды", - деп Мамин, аталған мәселені бір апта мерзім ішінде шешуді тапсырды.

Премьер-министр Цифрлық даму, инновациялар және аэроғарыш өнеркәсібі министрлігіне Білім және ғылым министрлігімен бірлесіп, үздік халықаралық тәжірибелерді пайдалана отырып, АT-мамандарын сапалы даярлау жөніндегі жұмысты жандандыруды тапсырды.

Доллар арзандады