Алматыда Dostyk Plaza сауда - ойын-сауық орталығына келушілер эвакуацияланды, - деп хабарлайды Tengrinews.kz тілшісі оқиға орнынан. Сауда орталығында "Назар аударыңыздар, өрт! Жалпы эвакуация. Ғимаратты босатуларыңызды сұраймыз" деген хабарландыру айтылды.
Түтіндеу үшінші қабатта болды. Сауда - ойын-сауық орталығында түтіннің иісі таралып кетті. Алматы ТЖД хабарлауынша, құтқарушыларға ғимарат түтіндеп жатқаны туралы хабарлама келіп түскен. Оқиға орнына өрт сөндіру машиналары келіп жетті.
Айта кетейік, "Dostyk Plaza" сауда - ойын-сауық орталығы 2014 жылы ашылған. Үш қабатты кешен ғимаратында 174 дүкен, 18 дәмхана және мейрамхана, сондай-ақ 10 залдан тұратын кинотеатр бар.