Алматыдағы "Көкжиек" ықшамауданында көпқабатты үйден өрт шықты, - деп хабарлайды Tengrinews.kz тілшісі.
"16:03-те Алматы ТЖД" "101" пультіне Жетісу ауданы, "Көкжиек", 32-үй мекенжайы бойынша өрт шыққаны туралы хабар түсті. Өрт сөндірушілер оқиға орнында жұмыс істеп жатыр. Олар эвакуация жүргізіп, өртті сөндіріп жатыр. Қосымша ақпарат кейінірек хабарланады", - деп хабарлады Алматы ТЖД ресми өкілі Сандуғаш Баймұхамбетова.
Ал кейінірек ҚР ІІМ ТЖД өкілдері өрт жайлы толығырақ мәлімет берді.
"Өрт сөндірушілер оқиға орнына 16:11-де жетті, оқиға орнына келген өрт сөндіру бөлімшесі үйдің 1 мен 5-қабат аралығындағы бет жағы өртеніп жатқанын анықтады. Өрттің алдын ала аумағы 1000 шаршы метр. Үйдің төбесін түгелдей өрт шалған", - деп хабарлады ҚР ІІМ ТЖД өкілдері.
Қазіргі уақытта өртті сөндіруге 20-дей өрт сөндіруші мен 20 дана техника жұмылдырылған. Өртенген үйден 300 адам эвакуацияланған.
"Зардап шеккендер туралы мәлімет түспеді", - деді ведомство өкілдері.