Алматыда полицейлер метрополитен жолаушыларын эвакуациялап жатыр, - деп хабарлайды Tengrinews.kz тілшісі. Қозғалыс тоқтатылған.
"Райымбек - Фурманов қиылысындағы метрода 5-7 минут бұрын эвакуация басталды, барлық адамдарды метродан алып шықты. Метроға кіреберісте полицейлер жолақ іліп қойған. Оқиға орнында полиция, жедел жәрдем және метро қызметкерлері жүр", - деп хабарлады куәгерлер.
"Жолаушыларды түсіріп тастады. Екі құрамда тоқтап тұр. Байқоңыр станциясында адамдарды эвакуациялап жатыр", - дейді біреулер.
Алматы метрополитенінің баспасөз қызметіндегілер метро ғимаратында жарылғыш заттың орнатылғаны туралы аноним қоңырау түскенін мәлімдеді.
"Аноним қоңырау шамамен сағат 19:00-де ішкі істер бөліміне түскен және онда метрода жарылғыш заттың орнатылғаны хабарланған. Тексеру шаралары жүргізіліп жатыр, барлық станциядан адамдар эвакуацияланды", - деді "Метрополитен" баспасөз қызметінің өкілі Ажар Хабиева.
"Жолаушылардың қауіпсіздігін қамтамасыз ету шаралары жүргізіліп жатыр. Тұрғындарды алаңдамауға және сабырлық сақтауға шақырамыз. Толығырақ ақпарат кейінірек жағдайға байланысты таратылатын болады", - деді Алматы ІІД өкілі.
