Алматы облысында жарылыс болды. Бір адам қаза тапты
Алматы облысындағы зауыттардың бірінде жарылыс болды, - деп хабарлайды Тengrinews.kz тілшісі.
ТЖК мәліметі бойынша, 31 тамызда сағат 12.20 шамасында Қарасай ауданы Райымбек ауылында газ-бетон блоктарын өндіретін цехта жарылыс болды. Жоғары қысымдағы газбетонды блоктарды өндіру барысында автоклав жарылып, кейін цехтың жарылып, ғимарат бүлінген. Жарылыс салдарынан түтін мұржасының бір бөлігі жеке тұрғын үй секторының аумағына құлап кеткен.
Жарылыс болған жерден 1961 жылы туған ер адамның мәйіті табылды. Сондай-ақ, оқиға орнынан әр түрлі дене жарақатын алған үш адам аудандық ауруханаға жеткізілді.
Жарылыс салдарынан цех аумағында тұрған Мерседес МЛ-300 және Тойота Авенсис автокөліктері бүлінген.
Облыс әкімінің тапсырмасы бойынша қаза тапқан жұмысшының отбасына көмек көрсетіледі. Жарылыс салдарынан бүлінген үйлер мен басқа да әлеуметтік нысандар кәсіпорын қаражаты есебінен қалпына келтіріледі. Жұмыс 2-3 күн ішінде аяқталуы тиіс.
