Алматының таңғалдыратын арт-кеңістіктері

Алматы - әр ғимараты мен көшесінде шығармашылық тұнып тұрған шаһар. Арт-кеңістіктер, өнер мен шабыттың ғажайып әлеміне саяхат жасайық. Достарыңызды шақырып, шығармашылықтың бұрын-соңды білмеген тұстарын Алматы жүрегінен табыңыздар. Бұл мақалада біз туристердің де, қала тұрғындарының да мәдени таным көкжиегін арттыратын қызықты орындар тізімін жасадық.

"Дом на Барибаева 36" арт-кеңістігі

Мекенжайы: Бәрібаев көшесі,

Қаланың қақ ортасындағы Бәрібаев көшесінде нағыз шығармашылықтың ордасы - "Дом 36" орналасқан. Ол жай ғимарат емес, ол – суретшілер қылқаламмен қабырғаларға жан бітіретін, атмосферасы арт-вибрацияларға толы тұтас бір ерекше әлем. Арт-кеңістіктің әр бұрышынан таң қалдырып, таңдай қақтыратын дүниелерді табуға болады, онда өзгеше граффити мен инсталляцияларға дейін бар. Мұнда келген адам өзін өнер әлемінің бір бөлшегі сезінеді.

Арт-кеңістік бірнеше көпфункционалды залға бөлінген. Олардың әрқайсысы ерекше. Мұнда дәрісхана, акт залы, халал тағамдар ұсынатын асхана, кофехана, тағам дайындау барысын тамашалап, аспаздармен әңгімелесуге болатын шағын асүй мен көне заттар дүкені және әдемі бақ бар. Кеңістіктегі дәліздердің қабырғалары жергілікті суретшілердің туындыларына толы. Ал 1950 жылдардың басында бой көтерген ғимараттың қасбеті әлі күнге өрнектермен әрленген бастапқы қалпын сақтап қалған.

Үйдің жертөлесі – ойындарды жақсы көретіндер үшін нағыз жұмақ десек болады. Ондағы үстел ойындарының сан алуан түрі ең талғампаз адамның өзін қызықтырып жібереді.

"Дом 36"-да көрмелер, концерттер, шығармашылық кештері, арт-инсталляциялар, перформанстар, театр қойылымдары, фестивальдер, шеберлік-сағаттары, дәрістер, оқыту бағдарламалары, менторлық бағдарламалар, арт-шеберханалар мен басқа да түрлі шаралар ұйымдастырылып тұрады.

Black Market бары мен Repas арт-студиясы

Мекенжайы: Тимирязев көшесі 42, 16 пав.

Black Market арт-барында визуалды перфоманстар мен сиқырлы гастрономия ғаламына бойлайық, мұндағы әр кеш – қайталанбас оқиға. Бұл жерде арт пен аспаздық үйлесім тауып, тұтас өнер туындысына айналады. Жолыңыз болса, ең танымал Repas граффити-командасы суретшілерінің керемет арт-перфомансын да өз көзіңізбен көруіңіз мүмкін. Ал Black Market - жай ғана бар емес, ол - коктейль туындының ажырамас бөлшегі саналатын өнер әлеміне жол көрсетуші.

PLATFORMA арт-кеңістігі

Мекенжайы: Бәрібаев көшесі, 36/1.

"Платформада" шабыт пен шығармашылық идеялары жүзеге асырылып, әрбір әрекет жаңа дүниелер ашуға мүмкіндік береді. "Платформа" - стильдер, өнер мен мәдениет тоғысатын жер. Ғимараттың ішінде бірегей арт-галереялар, шеберханалар мен суретшілерге арналған лофттар орналасқан. Бұл жерде өнер туындыларын тамашалап қана қоймай, оның бір бөлшегіне айналуға да болады.

ALA Space арт-кеңістігі

Мекенжайы: Құрманғалиев көшесі, 32.

Алматы арт-сахнасының барлық құпиясын білемін десеңіздер, ALA Space арт-кеңістігіне баруға кеңес береміз. Ол - өнер мен технологиялар ұштасып, өзгеше дүниелер өмірге келетін жер. Алматының ең шығармашылық ауданында орналасқан ALA Space - заманауи эксперименттер мен өнердің классикалық түрлерінің қоспасы іспеттес. Мұнда инновациялық мультимедиа инсталляциялары мен көркемсурет туындылары қатар қойылған, кеңістіктің әр бұрышы сана-сезіміңізге ерекше әсер етеді. ALA Space-те өнерді көзбен көріп қана қоймай, жан-тәніңізбен сезінуге болады.

НЕсанаторий

Мекенжайы: Луганский көшесі, 54.

НЕсанаторий - шығармашылық пен қиял ұштасатын жер. Стандарттар мен ережелерді ұмытыңыздар – бұл арт-кеңістікте шығармашылықтың шегі жоқ. НЕсанаторий қабырғалары өз бетінше өмір сүретін секілді, ал ондағы әр бөлме – нонконформизмнің айрықша галереясы іспеттес. Мұнда өзгеше инсталляцияларды тамашалап, керемет перфоманстар көріп, өзіңіздің жеке туындыңызды жасауға атсалыса аласыздар.

ÓzgeEpic

Мекенжайы: Жібек Жолы даңғылы, 50А.

Алматы қаласының шығармашылық әлемінде стильдер мен мәдениеттер бірігіп, ерекше симбиоз жасалатын жер – ÓzgeEpic-тің орны бөлек. Ол – әрқайсысы түпсіз тарихтың бір тармағына айналатын перфоманстар мен лайв-арттарға арналған алаң. Бұл жерде өнерсүйер қауым мен өнерді жасағысы келетіндер кездеседі. ÓzgeEpic - әр адам эпикалық шығармашылық туындысының қатысушысы бола алатын жер.