Седарс-Синай медициналық орталығының (АҚШ) ғалымдары кофені жүйелі түрде тұтыну бауыр циррозы, бауыр обыры және осы ағза ауруларының асқынуынан болатын өлім қаупінің төмендеуімен байланысты екенін анықтады. Зерттеу нәтижелері Clinical Gastroenterology and Hepatology журналында жарияланды, деп хабарлайды Tengri Life тілшісі Газета.Ru басылымына сілтеме жасап.
Седарс-Синай медициналық орталығының (АҚШ) ғалымдары кофені жүйелі түрде тұтыну бауыр циррозы, бауыр обыры және осы ағза ауруларының асқынуынан болатын өлім қаупінің төмендеуімен байланысты екенін анықтады. Зерттеу нәтижелері Clinical Gastroenterology and Hepatology журналында жарияланды, деп хабарлайды Tengri Life тілшісі Газета.Ru басылымына сілтеме жасап.
Зерттеуге Ұлыбританияның UK Biobank биобанкінен бақылау басталған кезде бауыр циррозы немесе обыры болмаған 354 957 адам қатысты. Ғалымдар олардың денсаулық жағдайын орта есеппен 13 жыл бойы қадағалап отырған.
Талдау көрсеткендей, күніне бес немесе одан да көп шыныаяқ кофе ішетін адамдарда, кофе ішпейтіндермен салыстырғанда, цирроздың даму қаупі 32 пайызға, бауыр обырының қаупі 47 пайызға, ал бауыр ауруларынан болатын өлім ықтималдығы 42 пайызға төмен болған.
Бұл ретте оң әсер күніне бір-екі шыныаяқ ішкеннің өзінде байқалып, үш-төрт шыныаяқ ішкенде барынша айқын көрінген. Дегенмен, авторлар бұл нәтижелерді күн сайын бес шыныаяқтан артық кофе ішу туралы ұсыныс ретінде қабылдамау керектігін ескертеді.
Осы байланыстың ықтимал механизмдерін анықтау үшін зерттеушілер бауырдың магнитті-резонанстық томографиясы деректері мен қан талдауларының нәтижелерін де сараптады. Кофе сүйер қауымның бауырында май мен темірдің аз екені, фиброз бен қабыну белгілерінің сирек кездесетіні анықталды. Сонымен қатар бұл топта ағзаның сау жұмысына жауап беретін ақуыздар деңгейі жоғары, ал қабыну мен тіннің тыртықтануына байланысты ақуыздардың концентрациясы төмен болған.
Ұқсас нәтижелер кәдімгі кофені де, кофеинсіз кофені де ұнататындар арасында байқалды. Бұл қорғаныс әсері тек кофеинге ғана емес, сусынның құрамындағы басқа да биологиялық белсенді заттарға байланысты екенін болжауға мүмкіндік береді.
Ғалымдар бұл зерттеудің бақылау сипатында болғанын және бауыр ауруларының алдын алатын нақты кофе екенін дәлелдемейтінін айтады. Олардың сөзінше, алдын алудың негізгі шаралары ретінде бұрынғыша салауатты салмақты сақтау, алкогольді шектеу, тұрақты физикалық белсенділік пен қант, холестерин деңгейін және артериялық қысымды бақылау маңызды болып қала береді.
