Алматыда тұрғын үй кешенінің құрылысына байланысты көпжылдық ағаштар кесілді

Алматыда тұрғын үй кешенін салу үшін жүздеген көпжылдық ағаштар кесілген. Мұны заңсыз деп санаған жергілікті тұрғындар дабыл қаққан. Іске экологтар мен Сыбайлас жемқорлыққа қарсы қызмет қосылды, - деп хабарлайды Tengrinews.kz тілшісі Almaty.tv телеарнасына сілтеме жасап.

Телеарна мәліметінше, бұған дейін Қазақфильм шағынауданындағы тұрғын үй кешенінің маңы жасыл желекке толы саябақ болған. Бірақ екі жыл бұрын мердігер компания мұнда кезекті көпқабатты ғимарат салуды ұйғарған.

"Тұрғын үй саламыз деп құрылыс компаниясы 200-ден аса көпжылдық ағашты заңсыз кесіп тастады. Біз сот арқылы табиғатқа келген шығынды өтеп беруін талап етіп едік, 30-ға жуық тал отырғызып берді. Алайда мәселе мұнымен біткен жоқ. Олар бастапқы жобасында көрсетілгендей, 12 метрлік үй салуы керек еді. Бірақ биіктігі 22 метрге жететін ғимарат бой көтерді", – деді қала тұрғыны Елена Тесленко.

Ал мердігер компания бұл туралы тұрғындарға алдын ала ескертілгенін айтады. Өйткені жоба бойынша бұл аумаққа қоршау салынуы қажет болған.

"Бастапқыда 2 тұрғын үйдің ортасын бөліп тұратын жасыл желек салуды ұсынғанбыз. Алайда, тұрғындардың пікірі екіге бөлінді. Бір тарап күзде жапырақтар түсіп, айнала қоқысқа толатынын айтса, келесі тарап қарсы болмады. Енді көпшіліктің келісімімен қоршау салып жатырмыз", – деді құрылыс компаниясының өкілі Бақытжан Сабраев.

Ал экологтардың айтуынша, мұнда расымен де табиғатқа келген залал бар. Мәселенің ақ-қарасын анықтау үшін құзырлы мекемемен бірге тексеріс жүргізбекші.

"Бұл мекенжай бойынша ағаштарды кесу туралы өтініш түспеді. Сәйкесінше, біз ешқандай рұқсат қағазын бермедік. Шара қолдану үшін Алматы қалалық Полиция департаментіне жүгіндік. Дәл қазір нақты ештеңе айта алмаймыз. Бірақ жасыл желекке зиян келген", – деді Экология және қоршаған орта басқармасы бөлімінің бас маманы Нұрлан Сейтбеков.

Егер сараптама нәтижесі мердігер әрекетінен олқылық анықтаса, компания жарты жылдың ішінде оталған ағаштардың орнын толтыруға міндеттеледі. Бірақ залал көлемі еселеп өтеледі. Яғни, заңға сәйкес, 1 ағаш кесілсе, орнына 50-і егіледі. Сондай-ақ бұл іске қатысты тексеруді сыбайлас жемқорлыққа қарсы қызмет те қолға алмақ.

"Тексеріс жұмыстарына сарапшы мамандарды жұмылдыру қажет. Біз бұл жағдайға қатысты материалдарды алдық. Енді құзырлы органдар мән-жайды анықтайды", - деді ҚР Сыбайлас жемқорлыққа қарсы іс-қимыл агенттігінің қоғамдық кеңес мүшесі Айнұр Сәбитова.

Ал компания өкілі жобаның барлық қажетті тексерістен өткенін айтады. Бірақ мәселе анықталғанша, тұрғын үй кешені құрылысы тоқтамайтынын жеткізді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!