Астанада жұмыс күні мен мектеп сабақтарының басталу уақытын өзгерту ұсынылды, - деп хабарлайды Тengrinews.kz тілшісі елорда әкімдігінің баспасөз қызметіне сілтеме жасап.
Баспасөз қызметінің мәліметінше, "Астана LRT" жауапкершілігі шектеулі серіктестігі мониторинг жүргізіп, елордалық маршруттар мен көліктердің көше-жол желісіне үлкен салмақтың түскенін анықтады. Ол маршруттар мына мектептер орналасқан аудандар арқылы өтеді № 1, 3, 5, 6, 17, 31, 35, 38, 50, 53, 54, 56, 59, 60, 66, 70, 75.
"Мәселені шешу үшін жұмыс күні мен мектеп сабақтарының басталу уақытын өзгерту ұсынылды. Астананың білім басқармасы мектеп директорларына мектеп сабақтарын сағат 7.40-тан бастау туралы өзгерісті ата-аналармен талқылап, қарауды тапсырды", - делінген хабарламада.
Баспасөз қызметіндегілердің мәлімдеуінше, қазіргі таңда "Астанадағы кәсіпорындардың, ұйымдардың және мекемелердің жұмыс уақытын өзгерту мәселесі де қаралып жатыр".
