+7 (777) 001 44 99
Қазақша
Русский
English
Қазақша
Русский
English
Түркістан облысы Қазығұрт ауданына қарасты Қарабау ауылында Берлинді алу операциясына қатысқан 99 жастағы соғыс ардагері – Анарбай Мырзахметов тұрады, - деп хабарлайды Tengrinews.kz тілшісі 24.kz сайтына сілтеме жасап.
Майдангер ескі суреттер мен хаттарды ұқыппен ақтарып, соғыс жылдарын, жауынгерлік жолдастарын еске алды. Анарбай Мырзахметов соғыс басталғанда небәрі 15 жаста болған. Үш жыл бойы күн-түн демей тылда еңбек еткен. 1944 жылы жігіт әскерге шақырылды.
"Алдымен Семейде бір айлық дайындық курсынан өттім. Кейін алғы шепке жіберілдім. Варшаваны азат етуге қатыстым. Одан кейін Магдебург пен Берлин сияқты қалаларды алу үшін жасалған шабуыл операцияларына қатыстым. Жеңісті Берлинде қарсы алдым", – дейді соғыс ардагері.
Анарбай Мырзахметов туған ауылына тек 1950 жылы оралған. Мұнда ол халық шаруашылығын қалпына келтіруге атсалысып, мал шаруашылығымен айналысқан. Жұбайы Шамен екеуі он бала өсіріп, тәрбиелеген.
"Анарбай өте қатал және әділ адам. Бірақ ол әрқашан елге ашық, ақкөңіл. Оның тәрбиесінің арқасында балаларымыз өмірден өз орындарын тапты", – дейді ардагердің жары Шамен Мырзахметова.
Бүгінде Анарбай ақсақал – үлкен және тату отбасының тірегі. Оның 47 немересі, 93 шөбересі, 2 шөпшегі бар. Ардагер ұзақ жасауының сырын еңбекқорлық пен салауатты өмір салтымен байланыстырады.
Жалпы, Түркістан облысынан майданға 140 мың адам аттанған. Оның тек жартысы ғана елге оралды. Түркістандықтардың арасында 51 Кеңес Одағының Батыры және бір "Халық Қаһарманы" атағын алған азамат бар. Қазіргі уақытта Түркістан облысында Екінші дүниежүзілік соғыстың сегіз ардагері өмір сүріп жатыр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
