Бұрынғы мәдениет және спорт вице-министрі Ерлан Қожағапановқа қатысты іс сотқа берілді, - деп хабарлайды Tengrinews.kz тілшісі.
Бұл туралы Сенат отырысының кулуарында Сыбайлас жемқорлыққа қарсы іс-қимыл агенттігі төрағасының орынбасары Дархан Құрақбаев мәлімдеді.
"Іс аяқталды. Қожағапанов пен мердігер ұйым басшысы сотқа берілді – сот процесі жалғасып жатыр. Мұнда аса ірі көлемде қаржы жымқыру мәселесі қаралып жатыр", – деді Құрақбаев Сенат кулуарында журналистер сұрағына жауап бере отырып.
Құрақбаевтың айтуынша, іс бойынша келтірілген шығын өзгеріссіз қалған және 1 миллиард теңгеден асады.
"Сот жүріп жатыр, қазір аяқталу сатысында деп ойлаймын. Біз оған айып тағып отырған баптың санкциясы бойынша, қателеспесем, 7 жылдан 12 жылға дейін қарастырылған. Бірақ, сот барлық мән-жайды ескере отырып шешім шығарады деп ойлаймын. Сот ашық өтіп жатыр", - деп қорытындылады Сыбайлас жемқорлыққа қарсы іс-қимыл агенттігі төрағасының орынбасары.
Еске салайық, 2024 жылғы наурызда Сыбайлас жемқорлыққа қарсы қызмет жасырын тергеу шараларының нәтижесінде бұрынғы мәдениет және спорт вице-министрін ауыр сыбайлас жемқорлық қылмыс жасады деген күдікпен ұстағаны белгілі болды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!