Премьер-министр Кәрім Мәсімов ішкі істер және басқа мемлекеттік органдардың қоғамдық қауіпсіздікті қамтамасыз етуге арналған оқу-жаттығуларына оң баға берді, - деп хабарлайды Tengrinews.kz тілшісі Президент жанындағы Орталық коммуникациялар қызметіне сілтеме жасап.
Қоғамдық тәртіп пен қауіпсіздікті қамтамасыз етуге арналған оқу-жаттығулар бүгін Алматыда, сондай-ақ республиканың 12 қаласында өткен болатын. Оған ішкі істер, төтенше жағдайлар және тағы басқа бірқатар мемлекеттік органдар қатысты. "Шараның негізгі мақсаты орындалды. Мемлекеттік органдардың бірлескен іс-қимылдары, полицейлер мен апаттық-құтқару қызметтерінің техникалық дайындығы, сондай-ақ белгілі бір уақыт ішінде арнайы күштер мен құрал-жабдықтарды қайта құру қызметі тексерілді", - делінген ресми хабарламада.
Айта кетейік, қоғамдық тәртіп пен қауіпсіздікті қаумтамасыз етуге арналған республикалық оқу-жаттығуларға Президент көмекшісі - Қауіпсіздік кеңесінің хатшысы Қайрат Қожамжаров жетекшілік етті. Премьер-министр Кәрім Мәсімов оның барлығын бақылап отырды.
