Парижде өткен Дүниежүзілік жануарлар денсаулығы ұйымының (WOAH) 93-ші Бас сессиясында Қазақстанға аусылдан таза ел мәртебесі берілді, деп хабарлайды Tengrinews.kz Ауыл шаруашылығы министрлігіне сілтеме жасап.
Жаңа мәртебе
Шешімді WOAH-қа мүше 183 елдің делегаттары қабылдады. Енді Қазақстанның бүкіл аумағы ұйым стандарттарына сәйкес вакцинациялау жүргізілетін аусыл бойынша халықаралық деңгейдегі қолайлы аймақ деп танылды.
Қазақстан Шығыс және Орталық Азияда мұндай мәртебеге ие болған жалғыз ел екені атап өтілді.
Бұл Қазақстанға не береді?
Ауыл шаруашылығы министрлігі бұл мәртебе Қазақстанның халықаралық беделін нығайтып, шетелдік сауда серіктестерінің сенімін арттыруға және отандық мал шаруашылығы өнімдерінің экспорттық әлеуетін кеңейтуге жол ашатынын атап өтті. Министрлік мәліметінше, Қазақстан жыл сайын африкалық жылқы обасы мен классикалық шошқа обасы бойынша да қауіпсіз екенін дәлелдеп келеді, сондай-ақ құс тұмауының жоғары патогенді түрі мен африкалық шошқа обасына қатысты өзіндік декларацияларын тұрақты түрде қолдап отыр.
Халықаралық ынтымақтастық
Сессия аясында биологиялық қауіпсіздік, жануарлардың трансшекаралық ауруларына қарсы күрес және ветеринария саласындағы халықаралық ынтымақтастық мәселелері де талқыланды. Қазақстанның ғылыми-диагностикалық әлеуетті дамыту және WOAH халықаралық стандарттарын енгізу бойынша атқарған жұмысы жоғары бағаланды.
Тағы оқыңыз: Құтыру ма, әлде аусыл ма? Ресейдегі індет және оның Қазақстан үшін қауіп-қатері қандай?
