Оқу-ағарту министрі Ғани Бейсембаев Қазақстан мектептерінде оқу жылының аяқталуына қатысты мәлімдеме жасады, - деп хабарлайды Tengrinews.kz тілшісі.
Үкімет отырысында министрдің айтуынша, биыл оқу жылы "Білімім – Отанымa" атты бірыңғай сынып сағаттарын өткізумен аяқталады.
"Педагогикалық кеңестің шешімі бойынша, мектеп бітіруші түлектерге арналған "Мектебім, саған мың алғыс!" атты салтанатты іс-шараны 23 немесе 24 мамырға жоспарлау ұсынылды", – деді Ғани Бейсембаев.
Осылайша, әр мектеп соңғы қоңырауды өткізу үшін жұма немесе сенбі күнін – қолайлы күнді таңдай алады.
Оқу-ағарту министрлігі мәліметінше, бұл күндері 11-сынып оқушылары үшін бірыңғай ұлттық тестілеу (ҰБТ) өтеді және ол аталған мерекелік күнмен сәйкес келіп отыр.
Сонымен қатар, 9 және 11-сынып түлектерінің қорытынды емтихандары 29 мамыр мен 16 маусым аралығында өтеді. Аттестат тапсыруға арналған салтанатты рәсім 18-20 маусымға белгіленген.
"Осы оқу жылын 3,9 миллион оқушы аяқтайды. Оның ішінде бастауыш сыныпта – 391 мың, негізгі мектепте – 364 мың бала оқиды. 217 мың бала – мектеп бітіруші түлектер. "Алтын белгіге" үміткерлердің саны бұрынғы жылдардағыдай – 5 пайыздан аспайды", – деп қосты Ғани Бейсембаев.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
