Лондонда салтанатты түрде шырша жарығын жағуға төрт қазақстандық оқушы қатысты. Олар мектеп оқушыларымен бірге Ұлыбритания премьер-министрі Риши Сунактың резиденциясына шақырылды, - деп хабарлайды Tengrinews.kz тілшісі.
Асылназ есімді 7 жастағы 3-сынып оқушысының анасы ерекше оқиғаны айтып берді. Ерлі-зайыпты Мерей мен Жұлдыз Қуандықовтар Қазақстанның Ұлыбританиядағы елшілігінде жұмыс істейді. Олардың қызы ұлыбританиялық бастауыш мектепте оқиды.
"23 қарашада сынып оқушылары шыршаны жағуға барады деген хат алдық. Премьер-министрдің болатыны еш жерде айтылмады. Мұны жергілікті тұрғындар түсінген шығар, бірақ біз жаңадан келгендіктен, оны білмедік. Дүйсенбі күні әдеттегідей балаларды мектепке жібердік", - дейді Жұлдыз.
Түстен кейін Асылназдың сыныбы мектеп директоры және сынып жетекшісімен бірге Даунинг-стритке – Вестминстердегі шағын көшеге барған. Бұл 200 жылдан аса Ұлыбритания үкіметінің ең маңызды қайраткерлерінің резиденциясы орналасқан көше ретінде белгілі.
"Қызымыздың әйгілі Даунинг-стрит №10-дағы премьер-министрдің резиденциясында болғанын және премьер-министрмен бірге шыршаны жаққанын кешке білдік!" - деп бөлісті Асылназдың анасы.
Сыныпта Асылназбен бірге елшіліктің қазақстандық қызметкерлерінің тағы үш баласы оқиды. Олар да Ұлыбритания премьер-министріне барған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
