Кения мен Танзания жол сапасы бойынша Қазақстаннан қалай асып түсті? Министрлік пікір білдірді 28 наурыз 2023, 14:24
Индустрия және инфрақұрылымдық даму министрлігі жол комитеті төрағасының орынбасары Амангелді Беков Дүниежүзілік экономикалық форумның (ДЭФ) Қазақстандағы жолдардың сапасы Кения мен Танзанияға қарағанда нашар деген рейтингімен келіспеді, - деп хабарлайды Tengrinews.kz тілшісі.
"Дүниежүзілік экономикалық форумның мәліметі бойынша, Қазақстан жол сапасы бойынша әлемде Кения мен Танзания сияқты елдерге жол беріп, 93-орынға шықты. Неге қазақстандық жолдар Африкадан да нашар болып шықты", - деп сұрады журналист Орталық коммуникациялар қызметіндегі брифингте.
Беков ДЭФ рейтингінде Қазақстан 93 емес, 63-орында тұрғанын, рейтингтің өзі сауалнамалар арқылы жасалғанын айтты.
"Елді мекендердің барлық тұрғынымен сауалнама жүргізіліп, жолдардың сапасы осыдан қалыптасады. Яғни, біреу бір көшенің жай-күйіне көңілі толмаса, ол жалпы жолдар туралы айтады. Сондықтан, бұл сауалнама әдісімен жүзеге асырылады және ол іс жүзінде жарамсыз деп айтуға болады", - деді Беков.
Беков Қазақстандағы жолдар Африкадағыдан кем емес деп сендірді.
"Біз Кениядан және мүлдем жол жоқ басқа елдерден артта қала алмаймыз", - деді ол.
Сілтемесіз жаңалық оқисыз ба? Онда Telegram желісінде парақшамызға тіркеліңіз!