+7 (777) 001 44 99
ПОДЕЛИТЬСЯ
Ғылым және жоғары білім министрі Саясат Нұрбек қазақстандық ғылымды қаржыландыруға мемлекеттік бюджеттен бөлінетін соманы айтты, - деп хабарлайды Tengrinews.kz тілшісі.
Ғылым және жоғары білім министрі Саясат Нұрбек қазақстандық ғылымды қаржыландыруға мемлекеттік бюджеттен бөлінетін соманы айтты, - деп хабарлайды Tengrinews.kz тілшісі.
"Келер үш жылда ғылымды қаржыландыруға, гранттық қаржыландыруға, бағдарламалық-нысаналы, тікелей гранттарға 650 миллиард теңге бөлінді. Мұндай қаржыландыру 30 жыл ішінде әлі болмаған, қазір 1,5 миллиард долларды ғылымға тікелей бағыттадық", - деді Саясат Нұрбек Астанада өткен Қазақстан-Қытай ынтымақтастығы жөніндегі II конференцияның ашылуында.
Шенеуніктің айтуынша, іргелі зерттеулерді қолдау үшін 9 миллиардқа жуық қаражат бөлінеді.
"Іргелі ғылымды ұмытпаймыз. Іргелі зерттеумен айналысатын 11 ҒЗИ-да кеңес заманынан қалған заңбұзушылықтар бар. Біздің міндетіміз - оларды сақтап қалып, кеңейтіп, қаржыландыру тапшылығынсыз жұмыс істеуге мүмкіндік беру. Олар үш жылға тікелей бюджеттен қаржыландырылып, ғылыми жоспарға ауыстырылды, енді институт тыныш жұмыс істейді", - деп атап өтті министр.
Саясат Нұрбектің айтуынша, министрлік ғылыми саланы қаржыландыруды ЖІӨ-нің 1 пайызына дейін жеткізуді жоспарлап отыр.
"Қаржыландыру ЖІӨ пайызымен есептеледі. 1991 жылы 0,84 пайыз, 2021 жылы 0,12 пайыз, 2022 жылы 0,13 пайыз болған еді. Биыл ғана 0,25 пайызға көтердік. Барлық күш-жігерді жинап, 2027-2028 жылдарға дейін 1 пайызға дейін жеткізуді жоспарлап отырмыз. Сондықтан ақша ғылымға бағытталады. Үкіметтен жүйелі қолдау бар. Біз мұның басымдық екенін түсінеміз", - деді министр.
Сондай-ақ, шенеунік бизнеске елеулі жеңілдіктер беретін ғылым және технологиялық саясат туралы жаңа заңның дайындалып жатқанын айтты.
"Бұл заңды қыркүйек-қазанда көпшілік алдында таныстырамыз. Парламентте талқылаудан өтіп, келер жылдың бірінші жартысында қабылдауды жоспарлап отырмыз. Онда жеке бизнестің ғылыми күн тәртібіне қатысуын ынталандыру бойынша мүмкіндіктер көзделеді. 150 пайызға салық жеңілдіктер болады. Бизнес жүйелі түрде ғылымды қажет етуі үшін. Бұл механизмді жүйелі түрде жасағымыз келеді. Қазір біз Қаржы министрлігі және Салық комитетімен Салық, Кәсіпкерлік, Бюджет кодекстерінде бизнестің қатысуы міндетті болуын байыпты талқылап жатырмыз", - деді Саясат Нұрбек.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
