+7 (777) 001 44 99
Қазақша
Русский
English
Қазақша
Русский
English
Павлодардағы №116 балабақшада зардап шеккен балалардың ата-аналары тәрбиешінің қатігез қарым-қатынасы туралы кездейсоқ білген, - деп хабарлайды Tengrinews.kz тілшісі.
Бұл туралы 24 маусым, сейсенбіде Павлодар облысының бала құқықтары жөніндегі уәкілі Сәуле Шәкенова мәлімдеді.
Ата-аналар балабақшаға басқа балаларға қысым көрсетіп жүрген бір бала жайлы естіген соң бейнебақылау жазбаларын көруге келген. Алайда кадрлардан мүлде басқа көріністі көрген.
"№116 балабақшаның бейнебақылау жазбаларын қарау барысында 2022 жылы туған балаларға тәрбиеші тарапынан қатігездікпен қарау деректері анықталды. Бұл балалардың көбі жас ерекшеліктеріне байланысты әлі сөйлей алмайды, олардың жасы екіден енді асқан", – деп түсіндірді ол.
Оның айтуынша, ата-аналар полиция мен Павлодар қаласының білім бөлімі өкілін шақырған. Сонымен қатар, Шәкеноваға бір ана жүгініп, содан кейін омбудсмен балабақшада зардап шеккен балалардың ата-аналарымен кездескен. Оның айтуынша, барлығы 15 ата-ана болған. Омбудсмен олардың пікірін тыңдап, бейнежазбалармен танысқан.
"Менің қатысуыммен полиция қызметкерлері бейнематериалдың толық нұсқасын зерттеу үшін ресиверді тәркіледі (бейнежазбалар 30 күн сақталады), бұл ҚР Қылмыстық кодексінің 140-бабы 2-бөлігі бойынша қозғалған қылмыстық іс аясында жүргізілді", – деп нақтылады Шәкенова.
Бала құқықтары жөніндегі уәкіл ата-аналармен бірге Павлодар қаласының Оңтүстік полиция бөліміне барғанын айтты.
"Арыздар мен түсініктемелер алынды, балаларға сот-медициналық сараптама тағайындалды. Балабақша басшысы да сұралды. Барлық ата-ана мен балаларға тегін психологиялық көмек ұсынылды", – деді Шәкенова.
Оның айтуынша, бейнежазбада көрінген тәрбиеші бұл балабақшада бір жылдан бері жұмыс істейді, жалпы еңбек өтілі – 10 жылдан астам. Ал қалалық білім бөліміндегілер түсірілген кадрларда ясли-бақшадағы кіші топтың тәрбиеленушілері екенін нақтылады.
Бөлім өкілдері қызметтік тексеріс жүргізіліп жатқанын, оның нәтижесінде мектепке дейінгі ұйымның басшысы мен тәрбиешісіне қолданыстағы еңбек заңнамасына сәйкес "ең қатаң шаралар" қолданылатынын мәлімдеді.
Бұған дейін өңірлік Полиция департаментінің баспасөз қызметі редакциямызға "кәмелетке толмаған баланы тәрбиелеу міндеттерін орындамау дерегі бойынша қылмыстық іс қозғалғанын" хабарлаған болатын.
ҚР ҚК 140-бабының 2-бөлігінің санкциясы 160 айлық есептік көрсеткішке дейін айыппұл, не 160 сағатқа дейін қоғамдық жұмыстарға тарту, немесе 40 тәулікке дейін қамауға алуды көздейді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
