Президент Елбасы туралы: Жұмыс істемейтін адам ғана қателеспейді 28 қаңтар 2022, 15:36
Президент Қасым-Жомарт Тоқаев қазақстандықтарды Нұрсұлтан Назарбаевтың жетістіктері мен қадір-қасиетін бірінші орынға қоюға, ал ықтимал есептерді елдің болашақ басшыларына қалдыруға шақырды, - деп хабарлайды Tengrinews.kz тілшісі.
Nur Otan партиясының съезінде сөйлеген сөзінде Тоқаев кемшіліктердің Америка президентіне де, қытай басшыларына да, тіпті сингапурлық көшбасшы Ли Куан Юға да тән екенін атап өтті.
"Сингапурдың да, АҚШ-тың да, Қытайдың да халқы мен билеуші топтары өз басшыларының қадір-қасиетін кемшіліктерден жоғары қояды. Өйткені бұрыннан белгілі: жұмыс істемейтін адам қателеспейді.
Тұңғыш Президенттің тарихи еңбегіне құрмет көрсетейік, оның жетістіктері мен қадір-қасиеттерін бірінші орынға қояйық, ал есептерді еліміздің болашақ басшыларына қалдырайық", - деді ол.
Ол Тұңғыш Президенттің тарихи еңбегін ұмытпауға шақырды.
"Ақыр соңында жан-жақты және шыншыл болу керек. Өткенін ұмытқан халықтың болашағы жоқ", - деді Президент.
Айта кетейік, қазір Nur Otan партиясының кезектен тыс XXI съезі басталды, оған еліміздің барлық өңірінен 389 делегат онлайн-форматта қатысып отыр. Сондай-ақ, съезге бейнеконференцбайланысы режимінде ел басшылығы, Саяси кеңес мүшелері, аймақтық филиал өкілдері, депутаттар мен үкімет мүшелері қосылған.
Бекітілген күн тәртібіне сәйкес келесі үш мәселе қаралады:
- Партия төрағасын сайлау туралы;
- Жарғыға өзгерістер мен толықтырулар енгізу туралы;
- Саяси кеңес құрамына өзгерістер енгізу туралы.
Сілтемесіз жаңалық оқисыз ба? Онда Telegram желісінде парақшамызға тіркеліңіз!